ທ່ານຮອງນາຍົກ ເນັ້ນບາງບັນຫາທີ່ຂະແໜງຊັບພະຍາກອນທຳມະຊາດ ແລະ ສິ່ງແວດລ້ອມ ຕ້ອງເອົາໃຈໃສ່

Standard

 

ຕອນ​ບ່າຍ​ວັນ​ທີ 3 ຕຸ­ລາ 2012 ນີ້ ທ່ານ ອາ​ຊາງ ລາວ​ລີ ຮອງ​ນາ­ຍົກ­ລັດ­ຖະ­ມົນ­ຕີ ປະ­ທານ​ຄະ­ນະ​ກຳ­ມະ­ການ​ສິ່ງ­ແວ­ດລ້ອມ​ແຫ່ງ​ຊາດ ໄດ້​ໃຫ້​ກຽດ​ໂອ້​ລົມ​ຕໍ່​ກອງ​ປະ­ຊຸມ​ປະ­ຈຳ​ປີ 2012 ຂອງ​ກະ­ຊວງ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ ທີ່​ຈັດ​ຂຶ້ນ​ວັນ​ທີ 2-4ຕຸ­ລາ 2012ຢູ່​ໂຮງ­ແຮມ​ໂກ​ສ​ໂມ ໂດຍ​ມີ​ທ່ານ ນູ​ລິນ ສິນ​ບັນ­ດິດ ລັດ­ຖະ­ມົນ­ຕີ​ວ່າ­ການ ກະ­ຊວງ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ ພ້ອມ​ດ້ວຍ​ພະ­ນັກ­ງານ​ກ່ຽວ­ຂ້ອງ​ເຂົ້າ​ຮ່ວມ.

ໂອ­ກາດ​ນີ້ ທ່ານ ອາ​ຊາງ ລາວ​ລີ ກໍ​ໄດ້​ຕີ​ລາ­ຄາ​ສູງ​ຕໍ່​ຜົນ­ສຳ­ເລັດ​ທີ່​ຂະ­ແໜງ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ ຍາດ​ມາ​ໄດ້​ໃນ 1 ປີ­ຜ່ານ­ມາ ເຊິ່ງ​ໄດ້​ປະ­ກອບ­ສ່ວນ​ສຳ­ຄັນ​ເຂົ້າ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ ຂອງ​ຊາດ​ເປັນ​ຢ່າງ​ດີ ພ້ອມ​ດຽວ​ກັນ ທ່ານ​ຍັງ​ໄດ້​ເນັ້ນ​ບາງ​ບັນ­ຫາ​ສຳ­ຄັນ​ທີ່​ຂະ­ແໜງ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ ຕ້ອງ​ໄດ້​ປັບ­ປຸງ​ແກ້​ໄຂ​ຢ່າງ​ຕັ້ງ­ໜ້າ ເປັນ­ຕົ້ນ ຕ້ອງ​ສືບ­ຕໍ່​ປັບ­ປຸງ​ກົງ­ຈັກ​ການ­ຈັດ­ຕັ້ງ​ໃຫ້​ສຳ­ເລັດ ພ້ອມ​ທັງ​ຊັບ­ຊ້ອນ​ບຸກ​ຄະ­ລາ​ກອນ​ໃສ່​ຕາມ​ຄວາມ​ຕ້ອງ­ການ​ຂອງ​ຕຳ­ແໜ່ງ​ງານ ໂດຍ​ສະ­ເພາະ​ຄວາມ​ຕ້ອງ­ການ​ໃຫ້​ແກ່​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ 3 ສ້າງ ເອົາ­ໃຈ­ໃສ່​ປັບ­ປຸງ​ແບບ­ແຜນ​ວິ­ທີ​ການ​ນຳ­ພາ ໂດຍ​ຖື​ສຳ­ຄັນ​ຫຼັກ­ການ​ລວມ​ສູນ​ປະ­ຊາ­ທິ­ປະ­ໄຕ ນຳ­ພາ​ເປັນ​ໝູ່​ຄະ­ນະ​ມອບ​ໃຫ້​ບຸກ­ຄົນ​ຮັບ­ຜິດ­ຊອບ ຄະ­ນະ​ນຳ​ແຕ່​ລະ​ຂັ້ນ​ຕ້ອງ​ເປັນ​ແບບ­ຢ່າງ​ໃນ​ການ­ເຄື່ອນ­ໄຫວ​ວິ­ຊາ​ສະ­ເພາະ ດຳ­ລົງ​ຊີ­ວິດ ແລະ ເປັນ­ໃຈ​ກາງ​ເຕົ້າ­ໂຮມ​ຄວາມ​ສາ­ມັກ­ຄີ ເອົາ­ໃຈ­ໃສ່​ບຳ­ລຸງ-ກໍ່­ສ້າງ​ພະ­ນັກ­ງານ​ໃຫ້​ມີ​ຄວາມ​ຮູ້​ຄວາມ​ສາ­ມາດ​ຕິດ​ ພັນ​ກັບ​ການ​ເອົາ­ໃຈ­ໃສ່​ວຽກ​ງານ​ການ­ເມືອງ-ແນວ​ຄິດ​ຂອງ​ພະ­ນັກ­ງານ.

ຍົກ​ລະ­ດັບ​ການ​ປົກ​ຫຸ້ມ​ຂອງ​ປ່າ­ໄມ້​ໃຫ້​ໄດ້ 65% ແລະ ຟື້ນ​ຟູ​ປ່າ​ທຳ​ມະ​ຊາດ ໃຫ້​ໄດ້ 3,9 ລ້ານ​ເຮັກ­ຕາ ໃນ​ປີ 2015 ເອົາ­ໃຈ­ໃສ່​ປັບ­ປຸງ​ກົດ­ໝາຍ​ການ​ປົກ​ປັກ​ຮັກ­ສາ​ສິ່ງ­ແວ­ດລ້ອມ ຊຸກ­ຍູ້​ສົ່ງ­ເສີມ​ໃຫ້​ທຸກ​ໂຄງ­ການ​ລົງ­ທຶນ ປະ­ຕິ­ບັດ​ດຳ­ລັດ​ວ່າ​ດ້ວຍ​ການ​ປະ​ເມີນ​ຜົນ​ກະ­ທົບ​ຕໍ່​ສິ່ງ­ແວ­ດລ້ອມ​ຢ່າງ​ ເຂັ້ມ​ງວດ.

ນອກ​ນີ້ ກໍ​ຕ້ອງ​ເອົາ­ໃຈ­ໃສ່​ຍົກ​ສູງ​ຄວາມ​ຮັບ­ຜິດ­ຊອບ​ໃນ​ການ​ຄຸ້ມ​ຄອງ​ໄພ­ພິ­ບັດ ແລະ ການ​ປ່ຽນ­ແປງ​ຂອງ​ດິນ​ຟ້າ​ອາ­ກາດ ໂດຍ​ການ​ສ້າງ​ເງື່ອນ­ໄຂ​ເພື່ອ​ດຳ­ເນີນ​ມາດ​ຕະ­ການ​ປ້ອງ​ກັນ ແລະ ກຽມ­ພ້ອມ​ຮັບ​ມື​ຢ່າງ​ທັນ​ການ ເອົາ­ໃຈ­ໃສ່​ພົວ­ພັນ​ຮ່ວມ​ມື​ກັບ​ປະ­ເທດ​ເພື່ອນ​ມິດ​ໃນ​ພາກ​ພື້ນ ແລະ ສາ­ກົນ ເພື່ອ​ຖອດ​ຖອນ​ບົດ­ຮຽນ​ການ​ຮ່ວມ​ມື ທຶນ­ຮອນ ກໍ​ຄື​ອຸ­ປະ­ກອນ ທີ່​ຈຳ­ເປັນ​ຮັບ​ໃຊ້​ແກ່​ການ­ເຄື່ອນ­ໄຫວ​ວຽກ​ງານ​ໃຫ້​ຫຼາຍ​ຂຶ້ນ

ເປີດນຳໃຊ້ອາຄານເຝິກແອບນັກບິນພົນລະເຮືອນ

Standard

ເປີດ​ນຳ​ໃຊ້​ອາ­ຄານ​ຝຶກ­ແອບ​ນັກ​ບິນ​ພົນ​ລະ​ເຮືອນ ລະ­ຫວ່າງ​ສູນ​ການ­ບິນ​ພົນ​ລະ​ເຮືອນ ແລະ ອົງ­ການ​ແພກ​ແທ໋ກ (PACTEC) ສຳ­ລັບ​ວຽກ​ງານ​ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ເປັນ​ວຽກ​ໜຶ່ງ​ທີ່​ມີ​ບົດ­ບາດ​ສຳ­ຄັນ​ຕໍ່​ວຽກ​ງານ​ຍຸດ​ທະ​ສາດ ແລະ ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ​ຂອງ​ລັດ­ຖະ­ບານ ກົມ​ການ­ບິນ​ພົນ​ລະ​ເຮືອນ ສປປ ລາວ ໄດ້​ມີ​ສ່ວນ​ຮ່ວມ ແລະ ປະ­ສານ​ສົມ­ທົບ​ເຂົ້າ​ໃນ​ວຽກ​ງານ​ຍຸດ​ທະ​ສາດ ແລະ ນະ­ໂຍ­ບາຍ​ຂອງ​ລັດ­ຖະ­ບານ ເຂົ້າ​ໃນ​ແຜນ​ພັດ­ທະ­ນາ​ຂອງ​ຂະ­ແໜງ­ການ​ບິນ​ແຕ່​ນີ້​ຮອດ​ປີ 2015 ແລະ ປີ 2020 ອີງ​ຕາມ​ແຜນ​ດັ່ງ­ກ່າວ ກົມ​ການ­ບິນ​ພົນ​ລະ​ເຮືອນ ສປປ ລາວ ແມ່ນ​ໄດ້​ເອົາ­ໃຈ­ໃສ່​ປັບ­ປຸງ​ພັດ­ທະ­ນາ​ສູນ​ຝຶກ​ການ­ບິນ​ພົນ​ລະ​ເຮືອນ ໃຫ້​ເປັນ​ສະ​ຖາ​ບັນ​ການ­ບິນ​ພົນ​ລະ​ເຮືອນ​ແຫ່ງ ສປປ ລາວ ນັບ​ແຕ່​ປີ 2004 ເປັນ­ຕົ້ນ​ມາ ອົງ­ການ​ແພກ​ແທ໋ກ (PACTEC) ໄດ້​ໃຫ້­ການ​ຊ່ວຍ­ເຫຼືອ​ອາ­ຈານ​ສອນ​ພາ­ສາ​ອັງ­ກິດ ແກ່​ສູນ​ຝຶກ​ການ­ບິນ​ພົນ​ລະ​ເຮືອນ​ລາວ ແລະ ຫຼາຍ​ກວ່າ 4 ພັນ​ຊົ່ວ­ໂມງ ສຳ­ລັບ​ການ​ສອນ​ພາ­ສາ​ອັງ­ກິດ​ທົ່ວ​ໄປ ແລະ ພາ­ສາ​ອັງ­ກິດ​ໃຫ້​ແກ່​ນັກ​ບິນ​ລາວ ນັກ​ບັນ­ຊາ​ຈາ­ລະ​ຈອນ​ທາງ​ອາ­ກາດ ທັງ​ນີ້​ເພື່ອ​ໃຫ້​ບັນ­ດາ​ນັກ​ບິນ​ລາວ ແລະ ນັກ​ບັນ­ຊາ​ຈາ­ລະ​ຈອນ​ທາງ​ອາ­ກາດ ເສັງ​ຜ່ານ​ພາ­ສາ​ອັງ­ກິດ​ລະ­ດັບ 4 ໃຫ້​ໄດ້​ຕາມ​ມາດ­ຕະ­ຖານ​ການ­ບິນ​ສາ­ກົນ (ICAO) ໂຄງ­ການ​ລິ​ເລີ່ມ​ຂອງ​ອົງ­ການ​ແພກ​ແທ໋ກ (PACTEC) ໂຄງ­ການ​ດັ່ງ­ກ່າວ​ນີ້ ໄດ້​ເລີ່ມ​ໃນ​ວັນ​ທີ 9 ກັນ­ຍາ 2011 ແລະ ຈະ​ສຳ­ເລັດ​ໃນ​ເດືອນ​ສິງ­ຫາ 2015 ມູນ​ຄ່າ​ທັງ​ໝົດ​ຂອງ​ໂຄງ­ການ​ປະ­ມານ 2 ລ້ານ​ໂດ​ລາ​ສະ­ຫະ­ລັດ ໂດຍ​ການ​ໃຫ້​ທຶນ​ຊ່ວຍ­ເຫຼືອ​ຈາກ​ອົງ­ການ​ແພກ​ແທ໋ກ (PACTEC).

ພິ­ທີ​ເປີດ​ນຳ​ໃຊ້​ອາ­ຄານ​ຝຶກ­ແອບ​ນັກ​ບິນ​ພົນ​ລະ​ເຮືອນ ລະ­ຫວ່າງ​ສູນ​ການ­ບິນ​ພົນ​ລະ​ເຮືອນ ແລະ ອົງ­ການ​ແພກ​ແທ໋ກ (PACTEC) ໄດ້​ຈັດ​ຂຶ້ນ​ໃນ​ວັນ​ທີ 28 ກັນ­ຍາ 2012 ທີ່​ຜ່ານ​ມາ ຢູ່​ສູນ​ຝຶກ​ການ­ບິນ​ພົນ​ລະ​ເຮືອນ ນະ­ຄອນ­ຫຼວງ​ວຽງ​ຈັນ ເຂົ້າ​ຮ່ວມ​ພາຍ​ໃນ​ງານ​ມີ​ທ່ານ ສົມ­ບູນ ດາວ​ສະ­ຫວັນ ຮອງ​ຫົວ­ໜ້າ​ກົມ​ການ­ບິນ​ພົນ​ລະ​ເຮືອນ​ແຫ່ງ ສປປ ລາວ ທ່ານ Gerald BOURGEOIS ຮອງ​ປະ­ທານ​ຜູ້­ອຳ­ນວຍ­ການ​ອົງ­ການ​ແພກ​ແທ໋ກ (PACTEC) ແລະ ບັນ­ດາ​ແຂກ​ທີ່​ຖືກ​ເຊີນ.

ຣັດເຊຍຈະຢຸດນຳເຂົ້າສາລີຈາກ ສ.ອາເມລິກາ

Standard

(ຂປລ): ຕາມ​ຂ່າວ​ຕ່າງ­ປະ­ເທດ, ຣັດ​ເຊຍ​ໄດ້​ປະ­ກາດ​ຢຸດ​ການ​ນຳ​ເຂົ້າ ແລະ ການ​ບໍ­ລິ­ໂພກ​ສາ­ລີ ຫລື​ສາ­ລີ​ປຸງ​ຕັດ​ຕໍ່​ພັນ­ທຸ​ກຳ ຈາກ​ສະ­ຫະ­ລັດ​ອາ­ເມ­ລິ­ກາ​ແລ້ວ ຫລັງ​ຈາກ​ມີ​ຜົນ​ການ​ສຶກ​ສາ ຈາກ​ມະ­ຫາ­ວິ­ທະ­ຍາ­ໄລ​ໃນ​ຝຣັ່ງ ພົບ​ວ່າ ສາ­ລີ​ປະ­ເພດ​ດັ່ງ­ກ່າວ ກໍ່­ໃຫ້­ເກີດ​ການ​ເປັນ​ມະ​ເຮັງ​ເຕົ້າ­ນົມ ແລະ​ສົ່ງ​ຜົນ​ກະ­ທົບ​ຕໍ່​ອະ​ໄວ​ຍະ​ວະ​ໃນ​ຮ່າງ­ກາຍ​ຂອງ​ມະ­ນຸດ. ຂະ­ນະ​ດຽວ​ກັນ, ໜ່ວຍ​ງານ​ຄວາມ​ປອດ​ໄພ ດ້ານ​ອາ­ຫານ​ຂອງ​ເອີ​ຣົບ ໄດ້​ສັ່ງ​ໃຫ້​ມີ​ການ​ທວນ­ຄືນ​ຜົນ​ການ​ວິ­ໄຈ​ດັ່ງ­ກ່າວ ຊຶ່ງ​ຄາດ​ວ່າ​ຈະ​ນຳ​ຜົນ​ປະ​ສູ່​ການ​ຢຸດ​ນຳ​ເຂົ້າ­ສາ­ລີ​ຊະ­ນິດ​ດັ່ງ­ກ່າວ ຂອງ​ອາ­ເມ­ລິ­ກາ ໃນ​ປະ­ເທດ​ອື່ນໆ​ອີກ​ດ້ວຍ. ຂ່າວ​ແຈ້ງ­ວ່າ: ສາ­ລີ​ທີ່​ມີ​ການ​ຕັດ​ຕໍ່​ພັນ­ທຸ​ກຳ​ດັ່ງ­ກ່າວ ຊຶ່ງ​ມີ​ຊື່­ວ່າ “NK603“ ຖືກ​ຜະ­ລິດ​ໂດຍ​ບໍ­ລິ­ສັດ ມອນ​ຊານ​ໂຕ ຂອງ​ສະ­ຫະ­ລັດ​ອາ­ເມ­ລິ­ກາ ແລະ​ການ​ຢຸດ​ນຳ​ເຂົ້າ​ດັ່ງ­ກ່າວ ຄາດ​ວ່າ ຈະ​ສົ່ງ​ຜົນ​ກະ­ທົບ​ຕໍ່​ສາຍ​ພົວ­ພັນ ດ້ານ​ການ​ຄ້າ​ແລະ​ການ​ທູດ​ຂອງ​ທັງ​ສອງ​ຝ່າຍ./.

ADB ສະໜັບສະໜູນແຜນພັດທະນາ ແລະ ການຫຼຸດຜ່ອນຄວາມທຸກຍາກຂອງ ສປປ ລາວ

Standard

ແຜນ​ຍຸດ​ທະ​ສາດ​ຮ່ວມ​ພັດ­ທະ­ນາ​ປະ­ເທດ​ຂອງ​ທະ­ນາ­ຄານ​ພັດ­ທະ­ນາ​ອາ­ຊີ (ADB) ສຳ­ລັບ ສປປ ລາວ ໄລ­ຍະ 2012-2016 ແມ່ນ​ໄດ້​ສ້າງ​ຂຶ້ນ​ເພື່ອ​ຊ່ວຍ​ລັດ­ຖະ­ບານ​ໃນ​ການ​ສ້າງ​ເສດ­ຖະ­ກິດ​ໃຫ້​ມີ​ຄວາມ​ຫຼາກ​ຫຼາຍ ຮອບ­ດ້ານ ແລະ ໝັ້ນ­ຄົງ ເພື່ອ​ກ້າວ​ໄປ​ສູ່​ການ​ຫຼຸດ­ຜ່ອນ​ຄວາມ­ທຸກ​ຍາກ.

ການ​ຈະ­ເລີນ​ເຕີບ​ໂຕ​ຢ່າງ­ຮອບ­ດ້ານ​ຈະ​ຕ້ອງ​ສຸມ​ໃສ່​ຂົງ­ເຂດ​ການ​ພັດ­ທະ­ນາ​ຊົນ­ນະ­ບົດ ບ່ອນ​ທີ່​ປະ­ຊາ­ຊົນ​ທຸກ​ຍາກ​ສ່ວນ​ໃຫຍ່​ອາ­ໄສ​ຢູ່ ໂດຍ​ຜ່ານ​ການ​ປັບ­ປຸງ​ໂຄງ​ລ່າງ​ພື້ນ­ຖານ​ດ້ານ​ເສັ້ນ­ທາງ​ຄົມ­ມະ­ນາ­ຄົມ ແລະ ພະ­ນັກ­ງານ ການ​ເສີມ​ຂະ­ຫຍາຍ​ຕ໋ອງ​ໂສ້​ທີ່​ສ້າງ​ມູນ​ຄ່າ ການ​ປັບ­ປຸງ​ເສັ້ນ­ທາງ​ອອກ​ສູ່​ຕະ­ຫຼາດ ແລະ ການ​ບໍ­ລິ­ການ​ສັງ­ຄົມ​ຕ່າງໆ ພ້ອມ​ທັງ​ເດີນ​ໜ້າ­ການ​ເຊື່ອມ​ຈອດ​ລະ­ຫວ່າງ​ຕົວ​ເມືອງ ແລະ ຊົນ­ນະ­ບົດ.

ສປປ ລາວ ສືບ­ຕໍ່​ຂະ­ຫຍາຍ­ຕົວ​ຢ່າງ​ໄວ­ວາ ໂດຍ​ໄດ້​ຮັບ​ແຮງ​ຍູ້​ຈາກ​ຂະ­ແໜງ­ການ​ຊັບ­ພະ­ຍາ­ກອນ​ທຳ​ມະ​ຊາດ (ພະ­ລັງ­ງານ​ໄຟ­ຟ້າ​ນ້ຳ­ຕົກ ແລະ ການ​ຂຸດ​ຄົ້ນ​ບໍ່​ແຮ່) ເຊິ່ງ​ເປັນ​ປັດ​ໄຈ​ຊຸກ­ຍູ້​ຫຼັກ​ຕໍ່​ກັບ​ການ​ຂະ­ຫຍາຍ­ຕົວ​ດັ່ງ­ກ່າວ.

“ແຜນ​ຍຸດ​ທະ​ສາດ​ຮ່ວມ​ພັດ­ທະ­ນາ​ຂອງ ADB ສຳ­ລັບ ສປປ ລາວ ໄລ­ຍະ 2012-2016 ແມ່ນ​ໄດ້​ສ້າງ​ຂຶ້ນ​ເພື່ອ​ຊຸກ­ຍູ້​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ ຄັ້ງ​ທີ 7 ຂອງ​ລັດ­ຖະ­ບານ ແລະ ທັງ​ດຳ­ເນີນ​ໄປ​ຕາມ​ທິດ​ທາງ​ແຜນ​ຍຸດ​ທະ​ສາດ 2020 ຂອງ ADB ເຊິ່ງ​ມີ​ຈຸດ​ມຸ່ງ​ໝາຍ​ເຮັດ​ໃຫ້​ອາ­ຊີ ແລະ ປາ​ຊີ​ຟິກ ຫຼຸດ​ພົ້ນ​ອອກ​ຈາກ​ຄວາມ­ທຸກ​ຍາກ” ທ່ານ ຈັອງ ຈີ​ນາຍ ຜູ້­ຕາງ­ໜ້າ​ທະ­ນາ­ຄານ​ພັດ­ທະ­ນາ​ອາ­ຊີ ປະ­ຈຳ ສປປ ລາວ ກ່າວ​ວ່າ: “ແຜນ​ຍຸດ​ທະ​ສາດ​ຮ່ວມ​ພັດ­ທະ­ນາ​ຂອງ ADB ສຳ­ລັບ ສປປ ລາວ ເຊິ່ງ​ໄດ້​ຮັບ​ການ​ຮ່ວມ​ມື​ໃນ​ການ​ກະ­ກຽມ ແລະ ການ​ປຶກ­ສາ​ຫາ­ລື​ຢ່າງ​ໃກ້­ຊິດ​ກັບ​ລັດ­ຖະ­ບານ ບັນ­ດາ​ຄູ່​ຮ່ວມ​ພັດ­ທະ­ນາ ລວມ​ທັງ​ພາກ​ເອ­ກະ​ຊົນ ແລະ ອົງ​ການ­ຈັດ­ຕັ້ງ​ສັງ­ຄົມ ເຊິ່ງ​ໃນ​ນັ້ນ ລວມ​ມີ​ອົງ­ການ​ທີ່​ບໍ່​ສັງ­ກັດ​ລັດ­ຖະ­ບານ ຈະ​ຊຸກ­ຍູ້ ສປປ ລາວ ໃຫ້​ພົ້ນ​ອອກ​ຈາກ​ຄວາມ­ທຸກ​ຍາກ ແລະ ຫຼຸດ​ພົ້ນ​ອອກ​ຈາກ​ປະ­ເທດ​ດ້ອຍ​ພັດ­ທະ­ນາ​ໃນ​ປີ 2020”.

ແຜນ​ຍຸດ​ທະ​ສາດ​ຮ່ວມ​ພັດ­ທະ­ນາ​ປະ­ເທດ ມີ​ຈຸດ­ປະ­ສົງ​ແນ­ໃສ່​ເພື່ອ​ເພີ່ມ​ປະ​ສິດ­ທິ​ຜົນ ແລະ ຄວາມ​ຍືນ​ຍົງ ໂດຍ​ຜ່ານ​ການ​ດຳ­ເນີນ​ງານ​ໂຄງ­ການ​ທີ່​ເພີ່ມ​ຂຶ້ນ​ຕະ­ຫຼອດ​ໄລ­ຍະ​ຂອງ​ແຜນ​ງານ ເພີ່ມ​ທະ­ວີ​ການ​ຮ່ວມ​ມື​ໂດຍ​ຜ່ານ​ແຜນ​ງານ​ການ​ຮ່ວມ​ມື​ອະ­ນຸ​ພາກ​ພື້ນ​ແມ່­ນ້ຳ​ຂອງ ແລະ ເພີ່ມ​ຄວາມ​ເອົາ­ໃຈ­ໃສ່​ຕໍ່​ກັບ​ບັນ­ຫາ​ທີ່​ເກີດ​ຂຶ້ນ​ໃໝ່ ໃນ​ຂະ­ນະ​ທີ່​ເສດ­ຖະ­ກິດ​ພວມ​ປ່ຽນ­ແປງ​ຢ່າງ​ໄວ­ວາ ແຜນ​ຍຸດ​ທະ​ສາດ​ຮ່ວມ​ພັດ­ທະ­ນາ​ປະ­ເທດ ໄດ້​ຖື​ເອົາ 4 ຂົງ­ເຂດ​ໜ້າ​ວຽກ​ເປັນ­ໃຈ​ກາງ​ອັນ​ສຳ­ຄັນ ເຊິ່ງ​ມີ​ຜົນ​ຕໍ່​ການ​ອອກ​ແບບ ແລະ ມຸ່ງ​ເນັ້ນ​ໃສ່​ບັນ­ດາ​ກິດ­ຈະ­ກຳ​ຕ່າງໆ ລວມ​ທັງ​ການ​ພັດ­ທະ­ນາ​ຂະ­ແໜງ­ການ​ເອ­ກະ​ຊົນ ການ​ບໍ­ລິ­ຫານ​ການ​ປົກ­ຄອງ ຄວາມ​ສະ­ເໝີ­ພາບ​ຍິງ-ຊາຍ ພ້ອມ​ທັງ​ການ​ຮ່ວມ​ມື ແລະ ການ​ເຊື່ອມ​ເຂົ້າ­ກັນ​ໃນ​ພາກ​ພື້ນ.

ແຜນ​ຍຸດ​ທະ​ສາດ​ຮ່ວມ​ພັດ­ທະ­ນາ​ໄດ້​ສຸມ​ໃສ່ 4 ຂະ­ແໜງ­ການ​ຫຼັກ ເຊັ່ນ: ສຶກ​ສາ ກະ­ສິ­ກຳ ແລະ ຊັບ­ພະ­ຍາ­ກອນ​ທຳ​ມະ​ຊາດ ນ້ຳ​ສະ­ອາດ ພ້ອມ​ດ້ວຍ​ໂຄງ​ລ່າງ​ພື້ນ­ຖານ​ຂອງ​ຕົວ​ເມືອງ ແລະ ການ​ບໍ­ລິ­ການ​ອື່ນໆ ແລະ ພະ­ລັງ­ງານ ການ​ເສີມ​ສ້າງ​ຄວາມ​ເຂັ້ມ­ແຂງ​ດ້ານ​ຂະ­ແໜງ­ການ​ບໍ­ລິ­ຫານ​ຄຸ້ມ​ຄອງ​ລັດ ແມ່ນ​ຖື​ເປັນ​ບັນ­ຫາ​ຂອງ​ຂະ­ແໜງ­ການ​ລວມ ເຊິ່ງ​ຂະ­ແໜງ­ການ​ດັ່ງ­ກ່າວ​ແມ່ນ​ເປັນ​ບັນ­ຫາ​ຫຼັກ ໃຫ້​ແກ່​ການ​ພັດ­ທະ­ນາ​ທີ່​ມີ​ປະ­ສິດ­ທິ­ພາບ ແລະ ປະ​ສິດ­ທິ​ຜົນ​ໃນ ສປປ ລາວ.

ສາວລາວ ບຽດຊະນະ ມາເລເຊຍ 3-2 ເຕະບານຍິງຊີງແຊ້ມອາຊຽນ

Standard

ນັກ​ເຕະ​ສາວ​ລາວ ລົງ​ສະ­ໜາມ​ນັດ​ທຳ​ອິດ ສາ­ມາດ​ໄລ່​ແຊງ​ເອົາ​ຊະ­ນະ​ສາວ​ມາ​ເລ​ເຊຍ ໄປ​ໄດ້​ແບບ​ຫວຸດ​ຫວິດ 3-2ໃນ​ການ​ແຂ່ງ­ຂັນ​ເຕະ­ບານ​ຍິງ​ຊີງ​ແຊ້ມ​ອາ​ຊຽນ 2012 ທີ່​ນະ­ຄອນ​ໂຮ່​ຈິນ​ມິນ ສສ ຫວຽດ­ນາມ ຂະ­ນະ​ທີ່​ວັນ​ທີ 18ກັນ­ຍາ 2012ກຽມ​ລົງ​ຊີ້​ຊະ​ຕາ​ກັບ​ທີມ​ຊາດ​ໄທ.

ຄວາມ​ເຄື່ອນ​ໄຫວ​ຂອງ​ການ​ແຂ່ງ­ຂັນ​ເຕະ­ບານ​ຍິງ​ຊີງ​ແຊ້ມ​ອາ​ຊຽນ 2012 ທີ່​ນະ­ຄອນ​ໂຮ່​ຈິ​ມິນ ສສ ຫວຽດ­ນາມ ລະ­ຫວ່າງ​ວັນ​ທີ 13-22ກັນ­ຍາ 2012ຫຼ້າ​ສຸດ​ອີງ​ຕາມ​ຂໍ້​ມູນ​ຈາກ​ເວັບ​ໄຊ aseanfootball.org ລາຍ​ງານ​ໃຫ້​ຊາບ ວັນ​ທີ 17ກັນ­ຍາ 2012ຜ່ານ​ມາ​ວ່າ: ນັກ​ເຕະ​ສາວ​ລາວ ລົງ​ສະ­ໜາມ​ນັດ​ທຳ​ອິດ​ຂອງ​ກຸ່ມ B ວັນ​ທີ 16ກັນ­ຍາ 2012ພົບ​ກັບ​ມາ​ເລ​ເຊຍ ທີ່​ນັດ​ທຳ​ອິດ​ເສຍ​ໃຫ້​ທີມ​ຊາດ​ໄທ ມາ 0-4ແລະ ເປັນ​ສາວ​ລາວ ທີ່​ສາ­ມາດ​ໄລ່​ແຊງ​ເອົາ​ຊະ­ນະ​ສາວ​ມາ​ເລ​ເຊຍ ໄປ​ໄດ້​ແບບ​ຫວຸດ​ຫວິດ 3-2ໂດຍ​ທີມ​ລາວ ໄດ້​ປະ­ຕູ​ອອກ​ນຳ​ກ່ອນ 1-0ຈາກ​ການ​ຍິງ​ຂອງ ສຸ­ພາ​ວັນ ໄພ​ວັນ ນາ­ທີໆ 18ແຕ່ ມາ​ເລ​ເຊຍ ມາ​ໄດ້​ສອງ​ປະ­ຕູ​ລວດ​ຈາກ Masturah Majid ນາ­ທີໆ 39ແລະ Zaryatie Zakaria ນາ­ທີໆ 79ກ່ອນ​ທີ່​ພຽງ​ນາ­ທີ​ດຽວ​ຕໍ່​ມາ ສາວ​ລາວ ມາ​ໄດ້​ຈຸ​ໂທດ ແລະ ກໍ​ເປັນ ສຸ­ຈິດ​ຕາ ພອນ​ຫາ​ລາດ ຍິງ​ເຂົ້າ​ໄປ ແນວ­ໃດ​ກໍ​ຕາມ​ຈາກ​ການ​ເສຍ​ປະ­ຕູ​ດັ່ງ­ກ່າວ ມາ​ເລ​ເຊຍ ກໍ​ອອກ​ຈາກ​ການ​ແຂ່ງ­ຂັນ ສົ່ງ​ຜົນ​ໃຫ້​ຝ່າຍ​ຈັດ­ການ​ແຂ່ງ­ຂັນ​ໃຫ້ ລາວ ຊະ­ນະ 3-2.

ສຳ­ລັບ​ທີມ​ຊາດ​ລາວ ຈະ​ລົງ​ສະ­ໜາມ​ນັດ​ສຸດ​ທ້າຍ​ຂອງ​ຮອບ​ທຳ​ອິດ ກັບ​ທີມ​ຊາດ​ໄທ ເພື່ອ​ຍາດ​ເອົາ​ອັນ​ດັບ​ທີ 1 ຂອງ​ກຸ່ມ ໃນ​ວັນ​ທີ 18 ກັນ­ຍາ 2012 ນີ້ ເວ­ລາ 16:00 ໂມງ ແນວ­ໃດ​ກໍ​ຕາມ ທີມ​ສາວ​ລາວ ແມ່ນ​ໄດ້​ຜ່ານ​ເຂົ້າ​ໄປ​ຫຼິ້ນ​ໃນ​ຮອບ​ຮອງ​ຊະ­ນະ​ເລີດ ຫຼື ຮອບ 4 ທີມ​ສຸດ​ທ້າຍ​ເປັນ​ທີ່​ຮຽບ​ຮ້ອຍ​ແລ້ວ ເນື່ອງ​ຈາ​ກວ່າ​ສາຍ​ນີ້ ມີ​ພຽງ 3 ທີມ​ເຂົ້າ​ຮ່ວມ ເພາະ­ວ່າ​ກ່ອນ​ການ​ແຂ່ງ­ຂັນ ອິນ​ໂດ​ເນ​ເຊຍ ຂໍ​ຖອນ​ຕົວ​ນັ້ນ​ເອງ.

ການສ້າງ-ສ້ອມແປງທາງ ຢູ່ນະຄອນຫຼວງ

Standard

ເພື່ອນ​ຜູ້​ອ່ານ​ຂາ​ປະ­ຈຳ​ຈາກ​ບ້ານ​ຂຸນ​ຕາ ສ່ອງ​ແສງ​ມາ​ໃນ​ວັນ​ສຸກ ທີ 7/9/2012 ວ່າ: ຢາກ​ໃຫ້​ບໍ­ລິ­ສັດ​ທີ່​ຮັບ​ເໝົາ​ສ້ອມ­ແປງ​ທາງ ຢູ່​ຈຸດ​ສວນ​ສາ­ທາ­ລະ­ນະ​ເຈົ້າ­ຟ້າ​ງຸ່ມ ເບິ່ງ​ຄືນ​ແດ່? ເພາະ​ຫຼາຍ​ເດືອນ​ແລ້ວ ທາງ​ຕໍ່­ໜ້າ​ພະ​ແນກ​ສຶກ​ສາ​ນະ­ຄອນ­ຫຼວງ ບໍ່​ແລ້ວ​ປານ​ນີ້ ! ມື້­ກ່ອນ​ລູກ​ຊາຍ​ຂີ່​ລົດ​ໄປ​ຕົກ​ຂຸມ​ຈົນ​ແຂນ​ຫັກ ວ່າ​ຊັ້ນ !.

ເວົ້າ​ເລື່ອງ​ການ​ປັບ­ປຸງ-ສ້ອມ­ແປງ​ເສັ້ນ­ທາງ​ຢູ່​ນະ­ຄອນ­ຫຼວງ​ເຮົາ​ໃນ​ໄລ­ຍະ​ນີ້ ແມ່ນ​ມີ​ຫຼາຍ​ເສັ້ນ​ແທ້ໆ ສະ­ນັ້ນ ຜູ້​ຂັບ​ຂີ່​ຍານ­ພາ­ຫະ­ນະ​ທັງ­ຫຼາຍ​ຕ້ອງ​ມີ​ສະ­ຕິ ຄ່ອຍ​ໄປ​ຄ່ອຍ​ມາ ບໍ່​ຊັ້ນ​ມີ​ຜົນ​ກະ­ທົບ​ຕໍ່​ຕົນ​ເອງ ຄື​ດັ່ງ​ເຫດ­ການ​ທີ່​ກ່າວ​ມາ​ຂ້າງ​ເທິງ.

ບາດ­ນີ້​ແມ່ນ​ເວົ້າ​ເລື່ອງ​ບໍ­ລິ­ສັດ​ຮັບ​ເໝົາ ກໍ່​ຄວນ​ຕິດ​ຕັ້ງ​ປ້າຍ​ເຕືອນ… ກາງ­ຄືນ​ກໍ່​ຕ້ອງ​ມີ​ດອກ­ໄຟ​ເຍືອງ ເພື່ອ​ແຈ້ງ​ໃຫ້​ຜູ້​ຂັບ​ຂີ່​ໄດ້​ຮູ້… ປ້າຍ​ເຕືອນ ຫຼື ໄຟ ຕ້ອງ​ມີ​ລັກ­ສະ­ນະ​ພິ­ເສດ ມີ​ແສງ​ສະ­ທ້ອນ ຄົນ​ຈຶ່ງ​ຈະ​ແນມ​ເຫັນ​ໄດ້​ງ່າຍ!…

ກ່ຽວ­ຂ້ອງ​ກັບ​ເຈົ້າ​ຂອງ​ໂຄງ­ການ​ອີກ ຕ້ອງ​ກວດ­ກາ​ຜູ້​ຮັບ​ເໝົາ ເພື່ອ​ໃຫ້​ຮູ້​ສາ­ເຫດ​ວ່າ ເປັນ​ຫຍັງ​ຈຸດ​ນັ້ນ​ແກ່­ຍາວ​ເວ­ລາ​ແທ້ ມີ​ເຫດ­ຜົນ​ແນວ­ໃດ? ຄວນ​ຖອນ​ໃຫ້​ຜູ້​ອື່ນ​ເຮັດ​ບໍ?.

ການ​ສ້ອມ­ແປງ​ເສັ້ນ­ທາງ​ຢູ່​ນະ­ຄອນ­ຫຼວງ​ນີ້​ລຳ­ບາກ ເພາະ​ຄົນ​ອາ­ໄສ​ຢູ່​ຫຼາຍ… ການ​ສັນ­ຈອນ​ກໍ່​ບໍ່​ສາ­ມາດ​ປິດ​ໄດ້ ສະ­ນັ້ນ ບໍ­ລິ­ສັດ​ໃດ​ຈະ​ມາ​ປະ­ມູນ​ຕ້ອງ​ໄດ້​ຄຳ­ນຶງ​ເຖິງ​ຈຸດ​ນີ້ ຄັນ​ແມ່ນ​ວ່າ​ຕົນ​ບໍ່​ມີ​ຄວາມ​ສາ­ມາດ​ກໍ່​ບໍ່​ຄວນ​ເຂົ້າ​ມາ​ນໍຜ່ານ​ມາ​ກໍ່​ມີ​ບາງ​ບໍ­ລິ­ສັດ​ເສຍ­ຊື່​ສຽງ​ຍ້ອນ ບໍ່​ທໍ່​ນັ້ນ ທຶນ­ຮອນ​ເຄື່ອນ​ໄຫວ​ກໍ່​ຕ້ອງ​ມີ​ພໍ​ສົມ­ຄວນ ເພາະ​ເວ​ລາ­ມັນ​ບີບ.

ຢູ່​ປະ­ເທດ​ອື່ນ​ຄັນ​ແມ່ນ​ມີ​ອຸ­ບັດ­ເຫດ​ຈາກ​ກໍ່​ລະ​ນີ​ເສັ້ນ­ທາງ​ຢູ່​ໄລ­ຍະ​ການ​ສ້ອມ­ແປງ​ນີ້… ຫາກ​ບໍ່​ມີ​ລະ­ບົບ​ແຈ້ງ​ເຕືອນ​ທີ່​ໄດ້​ມາດ­ຕະ­ຖານ ບໍ­ລິ­ສັດ​ຜູ້​ຮັບ​ເໝົາ​ຕ້ອງ​ເປັນ​ຜູ້​ໃຊ້​ຈ່າຍ…! ບໍ່​ຈ່າຍ ບໍ­ລິ­ສັດ​ປະ­ກັນ​ໄພ​ເຂົາ​ຈະ​ຟ້ອງ​ຂຶ້ນ​ສານ​ເພື່ອ​ຕັດ­ສິນ ສຳ­ລັບ​ຢູ່​ບ້ານ​ເຮົາ​ກໍ່​ບໍ່​ແນ່​ວ່າ​ໃນ­ຕໍ່­ໜ້າ ບໍ­ລິ­ສັດ​ປະ­ກັນ​ໄພ​ຊິ​ບໍ​ຟ້ອງ​ເນີ ! ແນວ​ວ່າ​ເຂົາ​ຕ້ອງ​ຈ່າຍ​ຄ່າ​ປະ­ກັນ​ໄພ​ໃຫ້​ລູກ​ຄ້າ​ເຂົາ.

ພວກ​ເຮົາ​ສ່ອງ​ແສງ​ຫຼາຍ​ເທື່ອ​ເລື່ອງ​ການ​ກໍ່­ສ້າງ ແລະ ສ້ອມ­ແປງ​ທາງ​ຢູ່​ນະ­ຄອນ­ຫຼວງ ໄດ້​ລົມ​ນຳ​ວິ­ຊາ​ການ​ທີ່​ເປັນ​ເຈົ້າ​ຂອງ​ໂຄງ­ການ ລົມ​ນຳ​ຜູ້​ຮູ້​ຫຼາຍ​ທ່ານ​ຈຶ່ງ​ຮູ້​ວ່າ ສ່ວນ​ຫຼາຍ​ໂຄງ­ການ​ບໍ່​ໄປ​ບໍ່​ມາ​ນັ້ນແມ່ນ​ຍ້ອນ​ຜູ້​ຮັບ​ເໝົາ​ຂາດ­ທຶນ​ໝູ­ນວຽນ ຜ່ານ​ມາ​ຜູ້​ຮັບ​ເໝົາ​ເຊັນ​ສັນ­ຍາ​ສຳ​ປະ­ທານ​ແລ້ວ ເອົາ​ເອ­ກະ­ສານ​ໄປ​ຄ້ຳ­ປະ­ກັນ ແລ້ວ​ເອົາ​ເງິນ​ຈາກ​ທະ­ນາ­ຄານ​ໃດ​ໜຶ່ງ​ມາ​ເປັນ​ທຶນ​ກໍ່­ສ້າງ… ດຽວ­ນີ້​ທະ­ນາ­ຄານ​ເຂົາ​ຮັດ­ກຸມ​ເລື່ອງ​ດອກ​ເບ້ຍ ເລື່ອງ​ໜີ້​ສິນ ເລີຍ​ກະ­ທົບ​ຕໍ່​ທຶນ​ໝູ­ນວຽນ​ຂອງ​ບໍ­ລິ­ສັດ.

ສະ­ນັ້ນ ຫຼາຍ​ຄົນ​ທີ່​ໄດ້​ລົມ​ເລື່ອງ​ການ​ກໍ່­ສ້າງ ແລະ ສ້ອມ­ແປງ​ທາງ​ຢູ່​ນະ­ຄອນ­ຫຼວງ​ນີ້ ມີ​ຄຳ​ເຫັນ​ວ່າ: ເຈົ້າ​ຂອງ​ໂຄງ­ການ​ຄວນ​ເຂັ້ມ​ງວດ ແລະ ກວດ­ກາ​ລະ­ອຽດ​ເຖິງ​ທຶນ­ຮອນ ແລະ ຄວາມ​ສາ­ມາດ​ຂອງ​ບໍ­ລິ­ສັດ​ຜູ້​ທີ່​ຈະ​ເຂົ້າ​ປະ­ມູນ… ແມ່ນ​ຢູ່​ວ່າ​ທຸກ​ວຽກ​ທຸກ​ງານ​ມັນ​ກໍ່​ຕ້ອງ​ມີ​ທີ່​ໄປ​ທີ່​ມາ​ນໍ? ມີ​ນ້ຳ​ຮ້ອນ​ນ້ຳ​ຊາ… ແຕ່​ກໍ່​ຄວນ​ມີ​ຂອບ​ເຂດ ມີ​ເພ­ດານ ເພາະ​ຫາ​ກວ່າ​ໂຍະ­ຍານ ເຫັນ​ອົກ​ເຫັນ­ໃຈ​ເກີນ​ໄປ ມັນ​ກໍ່­ສ້າງ​ຜົນ​ກະ­ທົບ​ເຖິງ​ຫຼາຍ​ຢ່າງ ໃນ​ນັ້ນ​ມີ​ອັນ​ໜຶ່ງ​ສຳ­ຄັນ​ແທ້ໆ ແມ່ນ​ສຽງ​ຈົ່ມ​ວ່າ​ຈາກ​ສັງ­ຄົມ ທີ່​ເວົ້າ​ໄປ​ໂລ­ເລ ຂາດ​ເຫດ­ຜົນ​ເນີ ! ແລ້ວ​ກະ­ທົບ​ເຖິງ​ລະ­ບົບ​ການ​ບໍ­ລິ­ຫານ

Office 2013 ປັບໜ້າຕາໃຊ້ງານລະບົບສຳຜັດ

Standard

 

ລາຍ​ງານ​ຂ່າວ​ຫຼ້າ​ສຸດ​ຈາກ​ໄມ​ໂຄຣ​ຊອບ (Microsoft) ໂດຍ​ເປີດ­ເຜີຍ​ວິ­ໄສ​ທັດ​ຂອງ​ຊອບ​ແວ (Software) ທີ່​ມີ​ຜູ້​ໃຊ້​ຫຼາຍ​ທີ່​ສຸດ​ໃນ​ໂລກ ແລະ ຖື​ເປັນ​ຜະ­ລິດ​ຕະ​ພັນ​ລ້ຳ​ເລີດ​ຂອງ​ໄມ​ໂຄຣ​ຊອບ ນັ້ນ​ຄື Office 2013 ເຊິງ​ບໍ່​ພຽງ​ແຕ່​ມີ​ການ​ປັບ­ປຸງ​ໜ້າ​ຕາ​ການ​ທຳ​ງານ​ໃຫ້​ໃຊ້​ສະ­ດວກ​ຍິ່ງ​ຂຶ້ນ ແຕ່​ຍັງ​ຮອງ​ຮັບ​ການ​ໃຊ້​ງານ​ຜ່ານ​ລະ­ບົບ​ສຳ­ຜັດ​ອີກ​ດ້ວຍ ໂດຍ​ສະ­ເພາະ​ເມື່ອ​ນຳ​ໃຊ້​ໃນ​ແທັບ​ເລັດ (Tablet) Windows 8 ແຖມ​ຍັງ​ປັບ​ປ່ຽນ​ນິ­ເວດ​ທາງ​ທຸ­ລະ​ກິດ​ຂອງ​ການ​ໃຊ້​ຊອບ​ແວ ດ້ວຍ​ການ​ເກັບ​ຄ່າ​ບໍ­ລິ­ການ​ສະ­ມາ­ຊິກ ແລະ ຄລາວ ຄອມ​ພິວ​ຕິງ (Cloud Computing)…

ທິດ​ທາງ​ຂອງ​ການ​ປັບ­ປຸງ​ໜ້າ​ຕາ Office 2013 ແມ່ນ​ປ່ຽນ​ຈາກ​ການ​ທີ່​ມີ​ເຄື່ອງ­ມື​ຫຼາຍ​ໂພດ ຈົນ​ໃຊ້​ບໍ່​ໝົດ ຫຼື ຫົກ​ຈົນ​ຊອກ​ບໍ່​ເຫັນ ໄປ​ສູ່​ໜ້າ​ຕາ​ໃໝ່​ທີ່​ງ່າຍໆ ແລະ ຕອບ​ສະ­ໜອງ​ການ​ໃຊ້​ງານ​ຢ່າງ​ໄວ­ວາ ນອກ​ນີ້​ຍັງ​ໃຊ້​ງານ​ໄດ້​ທັງ PC ແລະ ຄອມ​ພິວ​ເຕີ​ລະ­ບົບ​ໜ້າ​ຈໍ​ສຳ­ຜັດ ເຊັ່ນ ແທັບ​ເລັດ ໄດ້​ເປັນ​ຢ່າງ​ດີ Office 2013 ຍັງ​ສະ­ໜັບ­ສະ­ໜູນ​ການ​ທຳ​ງານ​ຮ່ວມ​ກັບ​ສະ​ໄຕລ​າສ (stylus) ກັບ​ແອັບ​ພລິ​ເຄ​ເຊິນ (Applications) ຕ່າງໆ ດ້ວຍ​ຟິດ​ເຈີ (Feature) ທີ່​ຮຽກ​ວ່າ “inking” ໃນ​ຂະ­ນະ​ທີ່​ການ​ໃຊ້​ງານ​ໃນ​ພີ​ຊີ ຈະ​ສາ­ມາດ​ສະ­ມັກ​ເປັນ​ສະ­ມາ­ຊິກ​ເພື່ອ​ໃຊ້​ງານ​ຮ່ວມ​ກັບ​ຄລາວ (Cloud) ໂດຍ​ຈ່າຍ​ຄ່າ​ບໍ­ລິ­ການ​ສຳ­ລັບ​ການ​ໃຊ້ SkyDrive ນອກ­ຈາກ​ນີ້ ການ​ໃຊ້​ບໍ­ລິ­ການ​ຕອບ​ໂຕ້​ລະ­ຫວ່າງ​ຜູ້​ໃຊ້ Office 2013 ດ້ວຍ​ກັນ ຈະ​ເປັນ​ລູກ​ຫຼິ້ນ​ໃໝ່​ທີ່​ຖື​ວ່າ​ແມ່ນ​ການ​ປ່ຽນ­ແປງ​ຄັ້ງ​ໃຫຍ່​ຂອງ​ຊອບ​ແວ​ໂຕ​ນີ້​ອີກ​ດ້ວຍ ຢ່າງ­ໃດ​ກໍ່​ຕາມ ສຳ­ລັບ Office ເວີ​ເຊິນ ເວບ​ເບດ (Web-based) ຈະ​ຍັງ​ໃຫ້​ໃຊ້​ລ້າ​ຢູ່ ແຕ່​ຖ້າ​ເປັນ​ເວີ​ເຊິນ​ເດ​ສະ​ທອບ (Desktop) ຈະ​ມີ​ບ່ອນ​ໃຫ້​ສະ­ມັກ​ສະ­ມາ­ຊິກ ເພື່ອ​ໃຊ້​ບໍ­ລິ­ການ​ຢູ່​ນຳ.

ສຳ­ລັບ​ທ່ານ​ໃດ​ທີ່​ສົນ­ໃຈ​ຢາກ​ທົດ​ລອງ​ນຳ​ໃຊ້ Office 2013 Customer Preview ສາ­ມາດ​ດາວ​ໂຫຼດ​ໄດ້​ທີ່ :

http://www.microsoft.com/office/preview/en

ເພື່ອ​ພິ­ຈາ­ລະ­ນາ​ວ່າ ມັນ​ເປັນ­ຕາ​ໃຊ້​ງານ​ຫຼາຍ​ໜ້ອຍ​ສ່ຳ​ໃດ ກ່ອນ​ທີ່​ຜະ­ລິດ​ຕະ​ພັນ​ສົມ­ບູນ​ຈະ​ເປີດ​ໂຕ​ຢ່າງ​ເປັນ​ທາງ​ການ ແລະ ວາງ​ຕະ­ຫຼາດ​ໃນ​ໄລ­ຍະ​ທ້າຍ​ປີ​ນີ້ ຊຶ່ງ​ລະ­ບົບ​ປະ­ຕິ­ບັດ​ການ​ທີ່​ຈະ​ໃຊ້​ຊຸດ​ແອັບ​ພລິ​ເຄ​ເຊິນ Office 2013 ໄດ້​ນັ້ນ ຈະ​ຕ້ອງ​ແມ່ນ Windows7, Windows 8 ຫຼື Windows RT (ສຳ­ລັບ​ແທັບ​ເລັດ) ເທົ່າ​ນັ້ນ.

WhatsApp ແມ່ນ​ຫຍັງ?

Standard

 

 

WhatsApp ແມ່ນ​ຫຍັງ? ເຊື່ອ​ວ່າ​ຫຼາຍ​ຄົນ​ທີ່​ໃຊ້​ມື​ຖື​ແບບ​ສະ­ມາດ​ໂຟນ ກໍ່​ຕ້ອງ​ເຄີຍ​ໄດ້​ຍິນ​ຄຳ​ຖາມ ທີ່​ຖາມ​ວ່າ ໃຊ້ WhatsApp ບໍ? ໄດ້​ລົງ WhatsApp ຫຼື​ຍັງ? ຊຶ່ງ​ອາດ​ເຮັດ​ໃຫ້​ຫຼາຍ​ຄົນ​ເກີດ​ອາ­ການ​ມຶນ​ງົງ ວ່າ WhatsApp ນີ້ ມັນ​ແມ່ນ​ຫຍັງ​ກັນ​ແທ້… ດັ່ງ­ນັ້ນ ເພື່ອ​ບໍ່​ໃຫ້​ຕົກ​ກະ­ແສ ເຮົາ​ມາ​ຮູ້­ຈັກ​ກັບ WhatsApp ກັນ​ດີ​ກວ່າ…

“WhatsApp” ແມ່ນ ແອັບ​ພລິ​ເຄ​ເຊິນ ສຳ­ລັບ​ມື​ຖື ໃຊ້​ເພື່ອ​ສົ່ງ​ຂໍ້­ຄວາມ​ແບບ​ບໍ່​ຈຳ­ກັດ ລວມ​ທັງ​ການ​ສົ່ງ​ຮູບ​ພາບ ສຽງ ແລະ ວີ​ດີ​ໂອ ຂ້າມ​ລະ­ບົບ​ປະ­ຕິ­ບັດ​ການ (Platform) ເຊັ່ນ​ວ່າ iPhone, BlackBerry, Android ແລະ Nokia ຊ່ວຍ​ໃຫ້​ສາ­ມາດ Chat ກັບ​ໝູ່​ເພື່ອນ​ທີ່​ໃຊ້​ມື​ຖື​ຕ່າງ​ລະ­ບົບ​ປະ­ຕິ­ບັດ​ການ ຕົວ­ຢ່າງ: ທ້າວ ກ ໃຊ້​ງານ BlackBerry ແຕ່​ທ້າວ ຂ ໃຊ້​ງານ Android ທັງ​ສອງ​ຄົນ​ສາ­ມາດ Chat ກັນ​ໄດ້​ງ່າຍໆ ໂດຍ​ບໍ່​ຕ້ອງ​ໂທ​ລົມ​ກັນ ພຽງ​ແຕ່​ໃຊ້ WhatsApp ຊຶ່ງ​ຈະ​ຕ້ອງ​ເຊື່ອມ​ຕໍ່​ຜ່ານ​ລະ­ບົບ GPRS/EDGE, WiFi ແລະ 3G.

ສະ­ຫຼຸບ WhatsApp ແມ່ນ​ໂປຣ​ແກຣມ Chat ທີ່​ມິ​ລັກ­ສະ­ນະ​ການ​ທຳ​ງານ​ຄ້າຍ­ຄື​ກັບ MSN ທີ່​ຫຼາຍ​ຄົນ­ຮູ້​ຈັກ​ກັນ​ດີ.

WhatsApp ສາ­ມາດ​ດາວ​ໂຫຼດ ແລະ ໃຊ້​ງານ​ໄດ້ “ຟຣີ” ສຳ­ລັບ BlackBerry, Android ແລະ Nokia ສ່ວນ​ຜູ້​ທີ່​ໃຊ້ iPhone ຖ້າ​ຫາກ​ຕ້ອງ­ການ​ໃຊ້ WhatsApp ນັ້ນ ຈະ​ຕ້ອງ​ໄດ້​ເສຍ​ຄ່າ​ໃຊ້​ຈ່າຍ​ເພື່ອ​ຊື້ ແອັບຯ ໃນ​ລາ­ຄາ $ 0,99.

WhatsApp ເຮັດ​ຫຍັງ​ໄດ້​ແດ່?

 -ສາ­ມາດ ແຊັດ ກັນ​ໝູ່​ເພື່ອນ​ໄດ້ ເຖິງ​ວ່າ​ຈະ​ໃຊ້​ງານ​ໂທລະ­ສັບ​ມື​ຖື​ຕ່າງ​ລະ­ບົບ​ກໍ່​ຕາມ ເພາະ WhatsApp ໃຊ້​ເບີ­ໂທລະ­ສັບ​ໃນ​ການ​ເຊື່ອມ​ຕໍ່

 -ສາ­ມາດ​ສົ່ງ​ຂໍ້­ຄວາມ ຮູບ​ພາບ ວີ​ດີ​ໂອ ແລະ ຄລິບ​ສຽງ​ຕ່າງໆ ໄດ້​ຢ່າງ​ວ່ອງ­ໄວ

 -ສາ­ມາດ​ສ້າງ​ກຸ່ມ​ເພື່ອ​ໃຊ້​ງານ ສຳ­ລັບ​ເວົ້າ​ລົມ​ກັນ​ສະ­ເພາະ​ກຸ່ມ​ໄດ້

 -WhatsApp ຮອງ​ຮັບ ແລະ ເຊື່ອມ​ຕໍ່​ການ​ສົ່ງ​ຂໍ້­ຄວາມ​ລະ­ຫວ່າງ iPhone ແລະ ໂທລະ­ສັບ​ມື​ຖື​ຮຸ່ນ​ອື່ນໆ​ໄດ້​ເປັນ​ຢ່າງ​ດີ

 -WhatsApp ໃຊ້​ງານ​ໄດ້​ງ່າຍ ດ້ວຍ​ໜ້າ​ຕາ​ທີ່​ລຽບ​ງ່າຍ

   ສາ­ມາດ​ດາວ​ໂຫຼດ WhatsApp ໄດ້​ທີ່ : www.whatsapp.com

 

Windows 8 ເປີດໂຕ 26 ຕຸລາ ສົກນີ້ !

Standard

 

ໄມ​ໂຄຣ​ຊອບ (Microsoft) ປະ­ກາດ​ເມື່ອ​ວັນ​ພຸດ​ທີ່​ຜ່ານ​ມາ​ວ່າ (18/07/2012) ທາງ​ບໍ­ລິ­ສັດ​ໄດ້​ກຳ­ນົດ​ວັນ​ເປີດ​ໂຕ​ລະ­ບົບ​ປະ­ຕິ­ບັດ​ການ​ຮຸ່ນ​ໃໝ່ Windows 8 ຢ່າງ​ເປັນ​ທາງ​ການ ໃນ​ວັນ​ສຸກ ທີ 26 ຕຸ­ລາ ປີ​ນີ້ ຢ່າງ­ໃດ​ກໍ່​ຕາມ ທາງ​ໄມ​ໂຄຣ​ຊອບ​ບໍ່​ໄດ້​ກ່າວ​ເຖິງ​ວ່າ ໄລ­ຍະ​ດັ່ງ­ກ່າວ​ຈະ​ມີ​ການ​ວາງ​ຈຳ­ໜ່າຍ Surface ຫຼື​ບໍ່? …

ໄມ​ໂຄຣ​ຊອບ ໄດ້​ທະ​ວິດ (Twitter) ຂໍ້­ຄວາມ​ຜ່ານ​ບັນ­ຊີ​ຜູ້​ໃຊ້ @Windows ວ່າ “ໃຫ້​ເຮັດ​ເຄື່ອງ­ໝາຍ​ໃນ​ລະ­ບົບ​ປະ­ຕິ­ບັດ​ການ​ຂອງ​ທ່ານ​ໄດ້​ເລີຍ ວິນ​ໂດ 8 ຈະ​ເປີດ​ໂຕ​ໃນ​ວັນ​ທີ 26 ຕຸ­ລາ 2012” ນອກ­ຈາກ​ນີ້ ສະ­ຕີ​ເວນ ໄຊ​ນອບ​ສະ​ກີ ປະ­ທານ​ຝ່າຍ​ວິນ​ໂດ​ຂອງ​ບໍ­ລິ­ສັດ ຍັງ​ໄດ້​ປະ­ກາດ​ຂ່າວ​ນີ້ ໃນ​ກອງ​ປະ­ຊຸມ​ຝ່າຍ​ຂາຍ​ປະ­ຈຳ​ປີ ຊຶ່ງ​ເມື່ອ​ຕົ້ນ​ເດືອນ​ຜ່ານ​ມາ ໄມ​ໂຄຣ​ຊອບ ໄດ້​ຢືນ­ຢັນ​ວ່າ Windows 8 ຈະ​ເປີດ​ໂຕ​ໃນ​ເດືອນ​ຕຸ­ລາ ແນ່­ນອນ ແຕ່​ບໍ່​ໄດ້​ລະ­ບຸ​ວັນ​ຊັດ​ເຈນ ໂດຍ​ລະ­ບົບ​ປະ­ຕິ­ບັດ​ການ​ຮຸ່ນ​ໃໝ່ ຈະ​ສາ­ມາດ​ທຳ​ງານ​ຮ່ວມ​ກັບ​ອຸ­ປະ­ກອນ​ອິນ​ພຸດ​ຕ່າງໆ (Input) ໄດ້​ທຸກ​ຊະ­ນິດ ເຊັ່ນ ລະ­ບົບ​ໜ້າ​ຈໍ​ສຳ­ຜັດ ເມົາ​ສ (Mouse) ຄີ​ບອດ (Keyboard) ແລະ ສະ​ໄຕລ​ັສ (Stylus).

ສຳ­ລັບ ແທັບ​ເລັດ (Tablet) Microsoft Surface ທີ່​ກ່ອນ​ໜ້າ​ນີ້​ມີ​ລາຍ​ງານ​ວ່າ ຈະ​ວາງ​ຕະ­ຫຼາດ​ພ້ອມໆ​ກັບ Windows 8 ແລະ ໄດ້​ມີ​ການ​ແນະ­ນຳ​ສິນ­ຄ້າ​ດັ່ງ­ກ່າວ​ໄປ​ແລ້ວ​ເມື່ອ​ເດືອນ​ທີ່​ຜ່ານ​ມາ ແຕ່​ທາງ​ບໍ­ລິ­ສັດ​ກໍ່​ບໍ່​ໄດ້​ມີ​ການ​ກ່າວ​ເຖິງ ຫຼື ໂພ​ສ (Post) ຂໍ້­ຄວາມ​ແຕ່​ຢ່າງ­ໃດ ນອກ­ຈາກ​ນີ້ ທາງ​ບໍ­ລິ­ສັດ​ຍັງ​ກ່າວ​ເຖິງ Windows Phone 8 ອີກ​ດ້ວຍ ໂດຍ​ຄາດ​ວ່າ​ຈະ​ມີ​ກຳ­ນົດ​ເປີດ​ໂຕ​ໃນ​ໄລ­ຍະ​ໃກ້ໆ​ກັບ​ວັນ​ທີ່ Windows 8 ເປີດ​ໂຕ ຊຶ່ງ​ກໍ່​ຕ້ອງ​ລໍ­ຖ້າ​ຕິດ­ຕາມ​ເບິ່ງ​ຄວາມ​ຊັດ​ເຈນ​ອີກ​ຕໍ່​ໄປ.

ຮຽບ​ຮຽງ​ໂດຍ: ນ.ລາ­ຊາ

 

ບັນຫາລົດຕິດຢູ່ບໍລິເວນຕະຫຼາດໂພນສະຫວ່າງ

Standard

 

ເພື່ອນ​ຜູ້​ອ່ານ​ນາມ​ວ່າ: ທ້າວ ກໍ​ລະ​ກັນ ຫຼວງ​ລາດ ຂຽນ ຈ.ມ ລົງ​ວັນ​ທີ 6 ກັນ­ຍາ 2012 ສ່ອງ​ແສງ​ເລື່ອງ​ລົດ​ຕິດ​ຢູ່​ບໍ­ລິ­ເວນ​ຕະ­ຫຼາດ​ໂພນ​ສະ­ຫວ່າງ ນະ­ຄອນ­ຫຼວງ​ເຮົາ​ນີ້​ເອງ !.

ເວົ້າ​ເລື່ອງ​ລົດ​ຕິດ​ນີ້ ພວມ​ເປັນ​ເລື່ອງ​ຟົດ​ເດືອດ​ຢູ່​ນະ­ຄອນ­ຫຼວງ ເຊິ່ງ​ມາ​ຈາກ​ຫຼາຍ​ສາ­ເຫດ… ຕາມ “ແນວ​ລາວ” ໄດ້​ໄປ​ໂອ້​ລົມ​ສົນ­ທະ­ນາ​ກັບ​ຫຼາຍ​ຄົນ ມີ​ຄຳ​ເຫັນ​ຕ່າງ​ກັນ​ໃນ​ການ​ແກ້​ໄຂ ເຊິ່ງ​ພໍ​ສະ­ຫຼຸບ​ໄດ້​ດັ່ງ­ນີ້:

1.ຕ້ອງ​ຈຳ­ກັດ​ບໍ່​ໃຫ້​ຊື້​ລົດ (ລົດ​ສີ່​ຕີນ) ໄດ້​ຕາມ­ໃຈ ນັບ​ທັງ​ຄອບ­ຄົວ ແລະ ບໍ­ລິ­ສັດ​ຕ່າງໆ… ບົດ­ຮຽນ​ນີ້ ຢູ່​ປະ­ເທດ​ຫວຽດ­ນາມ ເພິ່ນ​ພວມ​ດຳ­ເນີນ​ຢູ່.

2.ຕ້ອງ​ບັງ­ຄັບ​ບໍ່​ໃຫ້​ຈອດ​ລົດ​ແຄມ​ທາງ ດ້ວຍ​ການ​ສ້າງ​ບ່ອນ​ຈອດ​ລົດ​ໃຫ້​ຫຼາຍ​ຂຶ້ນ.

3.ໂຮງ­ຮຽນ ສຳ­ນັກ­ງານ​ໃດ ບໍ່​ມີ​ບ່ອນ​ຈອດ​ລົດ ຕ້ອງ​ມີ​ວິ­ທີ​ແນະ­ນຳ​ໃຫ້​ສ້າງ​ເດີ່ນ​ຈອດ​ລົດ.

4.ຕ້ອງ​ມີ​ເຈົ້າ​ໜ້າ­ທີ່​ລາດ­ຕະ­ເວນ​ເປັນ​ປະ­ຈຳ​ຕາມ​ເສັ້ນ­ທາງ​ສຳ­ຄັນ ເພື່ອ​ລົງ­ໂທດ​ພວກ​ມັກ​ຈອດ​ລົດ​ແຄມ​ທາງ​ດົນ​ໂພດ.

ສຳ­ລັບ​ເນື້ອ​ໃນ ຈ.ມ ຂອງ​ເພື່ອນ​ມີ​ດັ່ງ­ນີ້: ຂໍ​ຮຽນ ແລະ ນັບ­ຖື​ມາ​ຍັງ​ທ່ານ ບກ ໜັງ­ສື­ພິມ​ວຽງ​ຈັນ​ໃໝ່ ຂ້າ­ພະ­ເຈົ້າ ທ້າວ ກໍ​ລະ​ກັນ ຫຼວງ​ລາດ ປັດ­ຈຸ­ບັນ​ຢູ່​ບ້ານ​ຄຳ​ຮຸ່ງ ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ ຊຶ່ງ​ແຕ່​ລະ​ວັນ​ຂ້າ­ພະ­ເຈົ້າ ແລະ ປະ­ຊາ­ຊົນ​ຫຼາຍໆ​ທ່ານ​ທີ່​ອາ­ໄສ​ຢູ່​ໃນ​ເຂດ​ບ້ານ​ສີ­ວິ­ໄລ ບ້ານ​ຄຳ​ຮຸ່ງ ແລະ ເຂດ​ບ້ານ​ໃກ້​ຄຽງ ຕ້ອງ​ໄດ້​ເດີນ­ທາງ​ຜ່ານ​ຕະ­ຫຼາດ ແລະ ພົບ​ກັບ​ຄວາມ​ຫຍຸ້ງ­ຍາກ ແລະ ຄວາມ​ສັບ­ສົນ​ຂອງ​ຕະ­ຫຼາດ​ໂພນ​ສະ­ຫວ່າງ ເຮັດ​ໃຫ້​ບັນ­ຫາ​ລົດ​ຕິດ​ຍາວ ແລະ ຄວາມ​ບໍ່​ເປັນ​ລະ­ບຽບ​ຮຽບ​ຮ້ອຍ​ຂອງ​ຜູ້­ນຳ​ໃຊ້​ຖະ­ໜົນ​ຫົນ­ທາງ​ໃນ​ເຂດ​ດັ່ງ­ກ່າວ ຊຶ່ງ​ໃນ​ເວ­ລາ​ຕອນ​ເຊົ້າ​ເຂົ້າ​ມາ​ເຮັດ​ວຽກ​ກໍ​ລົດ​ຕິດ ແລະ ໃນ​ເວ­ລາ​ຕອນ​ແລງ​ເລີກ​ວຽກ​ກໍ​ຕິດ​ເອົາ­ແທ້­ເອົາ­ວ່າ ກວ່າ​ຈະ​ຜ່ານ​ດ່ານ​ນັ້ນ​ໄດ້​ໃຊ້​ເວ­ລາ​ເກືອບ​ຊົ່ວ­ໂມງ (ນັບ​ແຕ່​ສາມ​ແຍກ​ຕີນ​ຄ້ອຍ ຫາ​ສາມ​ແຍກ​ສະ­ຖາ­ນີ​ໂທລະ­ພາບ ແລະ ວິ­ທະ­ຍຸ​ກະ­ຈາຍ­ສຽງ​ແຫ່ງ​ຊາດ ບໍ່​ຮອດ​ສອງ​ກິ​ໂລ) ເນື່ອງ​ຈາກ​ການ​ເຮັດ​ເສັ້ນ­ທາງ​ທີ່​ບໍ່​ມີ​ການ​ສຶກ​ສາ​ຄັກ­ແນ່ ບໍ່​ໄດ້​ມາດ­ຖານ ແລະ ກໍ​ມີ​ການ​ເຮັດ​ຫຼາຍ​ເລນ ຫຼາຍ​ປ່ອງ​ໃຫ້​ລ້ຽວ​ຫຼາຍ​ເກີນ​ໄປ ຜູ້​ໜຶ່ງ​ຢາກ​ລ້ຽວ​ເຂົ້າ​ຕະ­ຫຼາດ ຜູ້​ໜຶ່ງ​ຢາກ​ລ້ຽວ​ກັບ ທາງ​ກໍ​ນ້ອຍ ຊ້ຳ­ບໍ່­ໜຳ​ຜູ້​ຂັບ​ຂີ່​ກໍ​ຈອດ​ແຄມ​ທາງ​ເພີ່ມ​ຂຶ້ນ ເຮັດ​ໃຫ້​ທາງ​ໄປ​ມີ​ແຕ່​ເລນ​ດຽວ.

ຂ້າ­ພະ­ເຈົ້າ​ເອງ​ກໍ​ເຫັນ­ໃຈ​ອ້າຍ​ນ້ອງ​ຕຳ­ຫຼວດ​ທີ່​ມາ​ປະ­ຕິ­ບັດ​ໜ້າ­ທີ່​ວຽກ​ງານ​ຂອງ​ຕົນ​ຢູ່​ໜ້າ​ຕະ­ຫຼາດ ຖ້າ​ມາ​ປະ­ຕິ­ບັດ​ວຽກ​ຜູ້​ດຽວ​ແມ່ນ​ຈົນ​ບາງ​ຄັ້ງ​ກໍ​ຍັງ​ບໍ່​ຮູ້​ວ່າ​ຊິ​ໂບກ​ເປີດ ຫຼື ປິດ​ທາງ​ແນວ­ໃດ ເພາະ​ຮ່ອມ​ທາງ​ກາງ​ແມ່ນ​ມີ​ຢູ່​ຫຼາຍ​ຊ່ອງ​ໂພດ

ສະ­ນັ້ນ ຕ້ອງ​ໃຊ້​ເຈົ້າ​ໜ້າ­ທີ່​ຕຳ­ຫຼວດ​ຈະ­ລາ­ຈອນ​ຢ່າງ​ໜ້ອຍ​ຕ້ອງ​ສາມ​ທ່ານ ແຕ່​ຍັງ​ບໍ່​ພົ້ນ​ລົດ​ຕິດ​ຄື­ເກົ່າ.

ຂ້າ­ພະ­ເຈົ້າ​ກໍ​ຮູ້​ວ່າ ຕະ­ຫຼາດ ກໍ​ເປັນ​ສ່ວນ​ໜຶ່ງ​ທີ່​ສຳ­ຄັນ​ໃນ​ການ​ພັດ­ທະ­ນາ​ປະ­ເທດ​ຊາດ ແຕ່​ຖ້າ​ມັນ​ສ້າງ​ຄວາມ​ສັບ­ສົນ​ໃຫ້​ປະ­ຊາ­ຊົນ​ຜູ້​ຜ່ານ​ໄປ​ມາ ກໍ​ຕ້ອງ​ປະ­ສານ​ກັບ​ເຈົ້າ​ຂອງ​ຕະ­ຫຼາດ ຫຼື ພາກ​ເອ­ກະ​ຊົນ ຊ່ວຍ​ກັນ​ແກ້​ໄຂ ບໍ່​ແມ່ນ​ຈະ​ເອົາ​ແຕ່​ຜົນ​ປະ­ໂຫຍດ​ສ່ວນ​ຕົວ​ຫຼາຍ​ເກີນ​ໄປ ຫຼື ປະ­ປ່ອຍ​ໃຫ້​ເປັນ​ບັນ­ຫາ​ແບບ​ນີ້ ເພາະ​ລົດ​ໃນ​ເຂດ​ນະ­ຄອນ­ຫຼວງ ກໍ​ນັບ​ມື້​ນັບ​ຫຼາຍ​ຂຶ້ນ ຊຶ່ງ​ຖ້າ​ປະ​ບັນ­ຫາ​ໄວ້ ມັນ​ກໍ​ຍິ່ງ​ຈະ​ເພີ່ມ​ໜັກ​ຂຶ້ນ​ເລື້ອຍໆ ສະ­ນັ້ນ ຂ້າ­ພະ­ເຈົ້າ​ຈຶ່ງ​ຢາກ​ສະ­ເໜີ​ທາງ​ສື່​ໜັງ­ສື­ພິມ ຊ່ວຍ​ເປັນ​ຜູ້​ປະ­ສານ​ງານ​ໃຫ້​ແນ່ ວ່າ​ທາງ​ຂັ້ນ​ເທິງ​ມີ​ແຜນ​ຈະ​ແກ້​ໄຂ​ແນວ­ໃດ​ບໍ່? ຫຼື ແມ່ນ​ພະ​ແນກ​ໂຍ­ທາ​ນະ­ຄອນ­ຫຼວງ ຄວນ​ເປັນ​ເຈົ້າ​ການ​ບໍ? ແຕ່​ຂ້າ­ພະ­ເຈົ້າ​ຄິດ​ວ່າ ຖ້າ​ປິດ​ຮ່ອມ​ທາງ​ກາງ​ໄດ້ ແລະ ສ້າງ​ເປັນ​ທາງ​ວົງ­ວຽນ​ໃຫ້​ກວ້າງ ກໍ​ຈະ​ຊ່ວຍ​ໃຫ້​ບັນ­ຫາ​ລົດ​ຕິດ​ໄດ້​ພໍ​ສົມ­ຄວນ ເໝືອນ​ກັບ​ບັນ­ດາ​ປະ­ເທດ​ທີ່​ຈະ­ເລີນ​ແລ້ວ ທີ່​ເຂົາ­ເຈົ້າ​ປະ­ສົບ​ຜົນ­ສຳ­ເລັດ​ໃນ​ການ​ແກ້​ໄຂ​ບັນ­ຫາ​ດັ່ງ­ກ່າວ.

ສຸດ​ທ້າຍ​ນີ້ ຂ້າ­ພະ­ເຈົ້າ​ຂໍ​ຂອບ­ໃຈ​ມາ​ຍັງ​ທ່ານ ບກ ມາ​ໃນ​ໂອ­ກາດ​ນີ້ ແລະ ຫວັງ​ວ່າ​ທ່ານ​ຈະ​ເປັນ​ຜູ້​ຊ່ວຍ​ປະ­ສານ ຫຼື ອອກ​ຂ່າວ ເພື່ອ​ໃຫ້​ພາກ­ສ່ວນ​ກ່ຽວ­ຂ້ອງ​ຊອກ​ວິ­ທີ​ແກ້​ໄຂ​ຊ່ວຍ​ດ້ວຍ?.

ຄວາມສ່ຽງນໍ້າຖ້ວມວຽງຈັນ

Standard

ມື້­ກ່ອນ​ຂຽນ​ບົດ​ເລື່ອງ​ນ້ຳ​ຖ້ວມ ຢູ່​ເມືອງ​ບາງ­ກອກ ປະ­ເທດ​ໄທ ວ່າ​ສາ­ເຫດ​ຫຼັກ​ມາ​ຈາກ​ການ​ເປັ່ງ​ນ້ຳ​ລົງ​ສູ່​ທະ­ເລ​ບໍ່​ໄດ້ ແລະ ນ້ຳ​ອັ່ງ ເພາະ​ມີ​ການ​ກໍ່­ສ້າງ​ຖົມ​ຄອງ​ນ້ຳ​ທຳ​ມະ​ຊາດ ເຊິ່ງ​ຂໍ້​ມູນ​ນີ້​ເຂົາ​ວ່າ​ກັນ​ເອງ! … ເລີຍ​ຕັ້ງ​ບັນ­ຫາ​ເລື່ອງ​ນະ­ຄອນ­ຫຼວງ​ວຽງ​ຈັນ ອາດ​ສ່ຽງ​ເພາະ​ດຽວ­ນີ້ ມີ​ການ​ກໍ່­ສ້າງ​ຖົມ​ຄອງ​ນ້ຳ ຫຼື ໜອງ​ກັນ​ແລ້ວ !…

ໄດ້​ອ່ານ​ບົດ ການ​ພັດ­ທະ­ນາ​ຜັງ­ເມືອງ ມີ​ສ່ວນ​ຊ່ວຍ​ປ້ອງ​ກັນ​ໄພ­ພິ­ບັດ​ຢ່າງ­ໃດ ? ເຊິ່ງ​ເປັນ​ບົດ​ສຳ­ພາດ​ທ່ານ ສຈ.ດຣ. ບຸນ​ເຫຼື່ອມ ສີ​ສຸ​ລາດ ຢູ່​ວາ­ລະ­ສານ​ສະ​ຖາ​ປາ​ນິກ ແລະ ວິ­ສະ­ວະ­ກອນ​ກໍ່­ສ້າງ​ລາວ ສະ­ບັບ​ທີ 030 ເພິ່ນ​ໃຫ້​ທັດ­ສະ­ນະ​ວ່າ: ຄວາມ​ສ່ຽງ​ຂອງ​ນ້ຳ​ຖ້ວມ​ນະ­ຄອນ­ຫຼວງ​ວຽງ​ຈັນ ແມ່ນ​ມາ​ຈາກ​ສອງ​ສາ­ເຫດ ຄື: ສາ­ເຫດ​ທີ​ໜຶ່ງ ແມ່ນ​ເກີດ​ຈາກ​ນ້ຳ​ລົ້ນ​ຄັນ​ຄູ (ຊຶ່ງ​ໄດ້​ຮັບ​ການ​ກໍ່­ສ້າງ​ຂຶ້ນ​ໃໝ່) ແລະ ອາດ​ຈະ​ເກີດ​ຂຶ້ນ​ໄດ້​ທຸກໆ 30 ປີ ຕາມ​ສະ­ຖິ­ຕິ.

ສາ­ເຫດ​ທີ​ສອງ ແມ່ນ​ເກີດ​ຂຶ້ນ​ຈາກ​ນ້ຳ​ຂັງ​ພາຍ​ໃນ​ຕົວ​ເມືອງ ຫຼື​ວ່າ​ນ້ຳ​ໄຫຼ​ອອກ​ບໍ່​ທັນ​ຍ້ອນ​ຮ່ອງ​ລະ­ບາຍ​ນ້ຳ​ອູດ​ຕັນ ຂາດ​ປະ­ຕູ​ນ້ຳ ແລະ ເຄື່ອງ​ຈັກ​ດູດ​ນ້ຳ​ບໍ່​ພຽງ­ພໍ ແລະ ເໝາະ​ສົມ.

ເວົ້າ​ເລື່ອງ​ນ້ຳ​ຖ້ວມ​ວຽງ​ຈັນ​ໃນ​ໄລ­ຍະ 50 ປີ­ຜ່ານ­ມາ​ນີ້ ມີ 3 ຄັ້ງ ຄື: ປີ 1966 1971 ແລະ 2008 ແຕ່​ໃນ​ຄັ້ງ​ປີ 1966 ແມ່ນ​ໜັກ­ໜ່ວງ​ຖ້ວມ​ຕະ­ຫຼາດ​ເຊົ້າ ແລະ ສະ­ໜາມ​ບິນ​ວັດ​ໄຕ.

ຜ່ານ​ການ​ພົບ​ປະ​ໂອ້​ລົມ​ຫຼາຍ​ຄົນ ແນວ​ລາວ ກໍ​ຄິດ​ຄື​ກັນ ເລື່ອງ​ອັນ­ຕະ­ລາຍ​ຈາກ​ນ້ຳ­ຂອງ​ບໍ່​ຫ່ວງ​ປານ­ໃດ ເພາະ​ມີ​ການ​ກໍ່­ສ້າງ​ຄູ​ກັນ​ນ້ຳ­ຂອງ​ແຂງ­ແຮງ​ແໜ້ນ­ໜາ ແລະ ສູງ​ພໍ​ສົມ­ຄວນ ແຕ່​ພັດ​ເປັນ​ຫ່ວງ​ນ້ຳ​ຂັງ ຫຼື ນ້ຳ​ອັ່ງ​ຈາກ​ທາງ​ໃນ ຊຶ່ງ​ອາດ​ບໍ່​ຮ້າຍ​ແຮງ​ເໝືອນ​ປີ 1966 ແຕ່​ຈະ​ສ້າງ​ຄວາມ​ລຳ​ຄານ ແລະ ມັນ​ຈະ​ແກ່­ຍາວ​ຍ້ອນ​ນ້ຳ​ໄຫຼ​ອອກ​ບໍ່​ໄວ… ສະ­ນັ້ນ ຫຼາຍ​ຄົນ​ຈຶ່ງ​ຕັ້ງ​ບັນ­ຫາ​ວ່າ ຄວນ​ຈັດ​ກອງ​ປະ­ຊຸມ​ຍາດ​ແຍ່ງ​ເອົາ​ຄວາມ​ເຫັນ​ຈາກ​ຫຼາຍໆ​ພາກ­ສ່ວນ ແລະ ເມື່ອ​ເປັນ​ເອ­ກະ​ພາບ​ກັນ​ແລ້ວ ຈຶ່ງ​ຊອກ​ວິ­ທີ​ແກ້​ໄຂ​ບັນ­ຫາ​ທີ່​ຈະ​ເກີດ​ຂຶ້ນ​ໃນ​ອະ­ນາ­ຄົດ ຕ້ອງ​ໄດ້​ຕັດ­ສິນ​ໃຈ​ລົງ­ທຶນ​ກໍ່­ສ້າງ​ກິດ­ຈະ­ການ​ໃດ​ໜຶ່ງ​ຢ່າງ​ຈິງ​ຈັງ ເພື່ອ​ປ່ອຍ​ນ້ຳ​ອອກ​ສູ່​ນ້ຳ­ຂອງ​ໃຫ້​ໄດ້​ໄວ​ທັນ​ການ.

ສຳ­ລັບ​ຄວາມ​ຄິດ​ເຫັນ​ເບື້ອງ​ຕົ້ນ​ຂອງ​ທ່ານ ສຈ.ດຣ ບຸນ​ເຫຼື່ອມ ສີ​ສຸ​ລາດ ຂຽນ​ໄວ້ ມີ​ດັ່ງ­ນີ້:

1. ຄວນ​ເອົາ­ໃຈ­ໃສ່​ຈຸດ​ປາຍ­ທາງ​ເສຍ​ກ່ອນ ໝາຍ​ຄວາມ​ວ່າ ລະ­ບົບ​ລະ­ບາຍ​ນ້ຳ​ອອກ​ຈາກ​ບຶງ​ທາດ­ຫຼວງ ລົງ​ໃສ່​ນ້ຳ­ໝາກ​ຮຽວ (ຫຼື ນ້ຳ​ງື່ມ) ດ້ວຍ​ເຮັດ​ເປັນ​ຮ່ອງ​ລະ­ບາຍ​ນ້ຳ​ຖາ­ວອນ ຂະ­ໜາດ​ໃຫຍ່ ພຽງ­ພໍ​ກັບ​ຄວາມ​ຕ້ອງ­ການ.

2. ການ​ສະ­ຫງວນ​ເຂດ​ບຶງ​ທາດ­ຫຼວງ ເພື່ອ​ບໍ່​ໃຫ້​ມີ​ການ​ຖົມ ແລະ ເຮັດ​ໃຫ້​ບໍ​ລິ​ມາດ​ບັນ­ລຸ​ນ້ຳ​ໜ້ອຍ​ລົງ ພ້ອມ​ກັນ​ນັ້ນ​ກໍ​ຄວນ​ມີ​ແຜນ­ການ​ລວງ​ພື້ນ​ບຶງ ແລະ ຂຸດ​ເອົາ​ຂີ້­ຕົມ​ອອກ ຕ້ອງ​ມີ​ວິ­ທີ​ສະ­ກັດ​ກັ້ນ​ການ​ລຸ­ກລາມ ໂດຍ​ການ​ກໍ່­ສ້າງ​ເສັ້ນ­ທາງ​ເລາະ​ບຶງ​ທາດ­ຫຼວງ​ທັງ​ສອງ​ດ້ານ ເພື່ອ​ກຳ­ນົດ​ເຂດ​ຂອງ​ບຶງ​ໃຫ້​ຈະ­ແຈ້ງ.

3. ການ​ປະ­ສານ​ສົມ­ທົບ​ກັບ​ພາກ­ສ່ວນ​ຊົນ­ລະ­ປະ­ທານ ເພື່ອ​ເປັນ​ເອ­ກະ​ພາບ​ໃນ​ດ້ານ​ການ​ໃຊ້​ນ້ຳ​ຈາກ​ຮ່ອງ​ລະ­ບາຍ​ນ້ຳ (ເພື່ອ​ບໍ່​ໃຫ້​ມີ​ປະ­ຕູ​ນ້ຳ​ຕັນ​ຮ່ອງ​ລະ­ບາຍ​ນ້ຳ).

4. ຕາມ​ຮ່ອງ​ລະ­ບາຍ​ນ້ຳ​ທີ່​ໄດ້​ສ້າງ​ໄປ​ແລ້ວ ຄວນ​ມີ​ການ​ລວງ​ຢູ່​ເລື້ອຍໆ ແລະ ຖ້າ​ຈຳ­ເປັນ​ຄວນ​ມີ​ການ​ຕິດ​ຕັ້ງ​ປ້ຳ​ດູດ​ນ້ຳ ເປັນ​ບ່ອນໆ​ທີ່​ໃຫ້​ຮ່ອງ­ນ້ຳ​ຢູ່​ຕົ້ນ​ທາງ­ບົກ​ແຫ້ງ​ລົງ (ໃນ​ເວ­ລາ​ຍາມ​ຝົນ).

5. ຂັ້ນ​ຕອນ​ສຸດ​ທ້າຍ​ແມ່ນ ການ​ສຳ​ຫຼວດ​ຄືນ​ວ່າ ຮ່ອງ​ລະ­ບາຍ​ນ້ຳ​ທີ່​ຖືກ​ຖົມ​ໄປ​ແລ້ວ​ນັ້ນ ຍັງ​ໄດ້​ໃຊ້​ການ​ໄດ້​ຫຼື​ບໍ່ ຄວນ​ຂຸດ​ຮ່ອງ​ໃຫ້​ຄື້ນ​ຢູ່​ສະ­ພາບ​ເດີມ​ຫຼື​ບໍ່ ແລະ ອື່ນໆ … ຖ້າ​ຫາກ​ຮ່ອງ​ທອງ​ອຸດ​ຕັນ​ເຂດ​ວັດ​ຈັນ ອິນ​ແປງ ອົງ​ຕື້ ມີ​ໄຊ ຫາຍ​ໂສກ ເຊິ່ງ​ເປັນ​ເຂດ​ເມືອງ­ເກົ່າ ແລະ ຕ່ຳ ອາດ​ຈະ​ມີ​ນ້ຳ​ຖ້ວມ​ນ້ຳ​ຂັງ​ໃນ​ອະ­ນາ­ຄົດ.

ສັດລ້ຽງໃນຫ້ອງນອນ… ອັນຕະລາຍຕໍ່ສຸຂະພາບຂອງຄົນ

Standard

ສັດລ້ຽງໃນຫ້ອງນອນ… ອັນຕະລາຍຕໍ່ສຸຂະພາບຂອງຄົນ               ນອນຮ່ວມກັນກັບໝາຄົນເຮົາອາດຕິດເຊື້ອໂຣກຈາກມັນໄດ້. ຈາກການສຶກສາຈາກນັກວິຊາການທາງການແພດໃນປະເທດເຢຍລະມັນພົບວ່າ: ຫາກໃຫ້ໝາຢູ່ເທິງຕຽງ ດຽວກັບເດັກ ຈະເຮັດໃຫ້ເດັກປ່ວຍດ້ວຍໂຣກລະບົບທາງເດີນຫາຍໃຈເຊັ່ນ: ນອນກົນ. ຄາລ ຟຣັງຄຣິນ ຈາກມະຫາວິທະຍາໄລແພດສາດອຸຍເມອາ (Umea) ແລະ ຜູ້ຮ່ວມງານໄດ້ເຮັດການ ກວດສອບຖາມຊາວສະແກນດີເນເວຍທີ່ເປັນໂຣກນອນກົນພົບວ່າ: 18% ຂອງພວກເຮົານອນກົນຢ່າງ ໜ້ອຍທີ່ສຸດອາທິດລະ 3 ຄືນ ໂດຍພວກເຂົາບອກວ່າ: ເຄີຍມີສັດລ້ຽງໃນຫ້ອງນອນໃນໄລຍະໄວເດັກ ແລະ ພວກເຂົາເຄີຍເປັນໂຣກຕິດເຊື້ອກ່ອນອາຍຸ 2 ປີ ຫລື ເປັນໂຣກຕິດເຊື້ອໃນຫູ ເຊິ່ງທ່ານໝໍຄາດ ວ່າສາເຫດຈະເປັນເພາະເຊື້ອໂຣກຈາກສັດລ້ຽງ ເຮັດໃຫ້ລະບົບທາງເດີນຫາຍໃຈຂອງຄົນອັກເສບ ແລະ ຜັນແປປ່ຽນເປັນໂຣກນອນກົນ. ນອກນີ້, ນັກວິໄຈດ້ານການນອນລັບຍັງກ່າວວ່າ: ຜູ້ໃຫຍ່ນອນຮ່ວມຕຽງດຽວກັບສັດລ້ຽງກໍ່ມີຜົນກະທົບ ຕໍ່ການນອນຫລັບ ເພາະຄວາມຕ້ອງການໃນການຫລັບຂອງຄົນ ແລະ ສັດບໍ່ປະສານກັນນັ້ນຄື: ແມວ ມັກຕື່ນໃນຕອນກາງຄືນ ແລະ ມັນໄປນອນທາງເທິງຫົວຂອງຄົນ. ສ່ວນໝາມັກຍ້າຍທີ່ນອນໃນກາງຄື້ນເລື້ອຍໆກິນນ້ຳ ແລະ ຍ່າງໄປມາ ແລະ 20% ຂອງໝາມັກນອນ ກົນ ແລະ 10% ຂອງໝາກໍ່ນອນກົນເຊັ່ນດຽວກັນ ຫລື ຫາກເປັນສັດລ້ຽງທີ່ມີຄູ່ຂອງມັນ ກໍ່ຍິ່ງຈະມີ ການລົບກວນເນື່ອງນັນຈົນເຮັດໃຫ້ເຈົ້າຂອງພວກມັນນອນບໍ່ຫລັບ.

ຫຼາຍແຫ່ງສະເຫຼີມສະຫຼອງວັນຄູແຫ່ງຊາດ

Standard

 

ວິ­ທະ­ຍາ­ໄລ​ຄູ​ດົງ​ຄຳ​ຊ້າງ ໄດ້​ຈັດ​ພິ­ທີ​ສະ­ເຫຼີມ­ສະ­ຫຼອງ​ວັນ​ຄູ​ແຫ່ງ​ຊາດ ທີ 7 ຕຸ­ລາ ຄົບ­ຮອບ 18 ປີ (ວັນ​ທີ 7 ຕຸ­ລາ 1994-7ຕຸ­ລາ 2012) ໄດ້​ຈັດ​ຂຶ້ນ​ໃນ​ວັນ​ທີ 4ຕຸ­ລາ 2012ທີ່​ວິ­ທະ­ຍາ­ໄລ​ດັ່ງ­ກ່າວ ໂດຍ​ເປັນ​ກຽດ​ເຂົ້າ​ຮ່ວມ​ຂອງ​ທ່ານ ບຸນ​ສຸກ ທີ­ລະ​ສັກ ຫົວ­ໜ້າ​ກົມ​ພາ­ລະ ແລະ ສິ­ລະ​ປະ ກະ­ຊວງ​ສຶກ​ສາ​ທິ​ການ ແລະ ກີ­ລາ ທ່ານ​ຮອງ​ຫົວ­ໜ້າ​ກົມ​ສ້າງ​ຄູ ພ້ອມ​ດ້ວຍ​ຄະ­ນະ​ອຳ­ນວຍ​ການ ຄູ-ອາ­ຈານ ແລະ ນ້ອງ​ນັກ​ສຶກ​ສາ ແຂກ​ທີ່​ຖືກ​ເຊີນ​ເຂົ້າ​ຮ່ວມ.

ການ​ສະ­ເຫຼີມ­ສະ­ຫຼອງ​ວັນ​ຄູ​ແຫ່ງ​ຊາດ​ໃນ​ຄັ້ງ​ນີ້ ແມ່ນ​ໄດ້​ຫວນ​ຄືນ​ປະ­ຫວັດ​ຄວາມ​ເປັນ​ມາ​ຄວາມ​ໝາຍ​ຄວາມ​ສຳ­ຄັນ​ຂອງ​ວັນ​ຄູ​ແຫ່ງ​ຊາດ ພ້ອມ​ນັ້ນ ກໍ​ໄດ້​ຂຶ້ນ​ອ່ານ​ສານ​ອວຍ­ພອນ​ວັນ​ຄູ​ແຫ່ງ​ຊາດ ພ້ອມ​ທັງ​ໄດ້​ມີ​ການ​ມອບ​ຊໍ່​ດອກ​ໄມ້ ແລະ ຂອງ­ຂວັນ​ໃຫ້​ແກ່​ຄູ-ອາ­ຈານ ເພື່ອ​ເປັນ​ການ​ລະ­ນຶກ​ເຖິງ​ບຸນ­ຄຸນ ແລະ ຄຸນ­ງາມ­ຄວາມ­ດີ​ຂອງ​ຄູ​ທີ່​ມີ​ຕໍ່​ປະ­ເທດ​ຊາດ ທີ່​ໄດ້​ຍົກ​ສູງ​ຄຸນ​ນະ​ພາບ​ຕົວ​ຈິງ​ດ້ານ​ການ​ຮ່ຳ­ຮຽນ​ຂອງ​ລູກ​ຫຼານ ກໍ​ຄື​ນ້ອງ​ນັກ­ຮຽນ-ນັກ​ສຶກ​ສາ ໄດ້​ຮັບ​ການ​ພັດ­ທະ­ນາ​ດີ​ຂຶ້ນ ເຮັດ​ໃຫ້​ຄຸນ​ນະ​ພາບ​ການ​ສຶກ​ສາ​ຂອງ​ຊາດ​ທຽບ​ເທົ່າ​ກັບ​ພາກ​ພື້ນ.

ຂ່າວ​ແຈ້ງ​ຕື່ມ​ອີ​ກວ່າ: ໃນ​ວັນ​ດຽວ​ກັນ​ນີ້ ທີ່​ສະ­ໂມ­ສອນ​ເມືອງ​ໄຊ​ເຊດ​ຖາ ກໍ​ໄດ້​ຈັດ​ພິ­ທີ​ສະ­ເຫຼີມ­ສະ­ຫຼອງ​ວັນ​ຄູ​ແຫ່ງ​ຊາດ ວັນ​ທີ 7 ຕຸ­ລາ​ເຊັ່ນ​ກັນ ໂດຍ​ການ​ເຂົ້າ​ຮ່ວມ​ຂອງ​ທ່ານ ຄຳ​ພວງ ຈູມ​ມະ​ລີ ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນະ­ຄອນ­ຫຼວງ​ວຽງ​ຈັນ ທ່ານ​ຮອງ​ເຈົ້າ­ເມືອງ​ໄຊ​ເຊດ​ຖາ ພ້ອມ​ດ້ວຍ​ພະ­ນັກ­ງານ ຄູ-ອາ­ຈານ ແລະ ພາກ­ສ່ວນ​ທີ່​ກ່ຽວ­ຂ້ອງ​ເຂົ້າ​ຮ່ວມ.

ໃນ​ວັນ​ດຽວ​ກັນ​ນີ້ ທີ່​ໂຮງ­ຮຽນ ມ.ປາຍ ມິດ­ຕະ­ພາບ ນະ­ຄອນ­ຫຼວງ​ວຽງ​ຈັນ-ນະ­ຄອນ​ໂຮ່​ຈິ​ມິນ ກໍ​ໄດ້​ຈັດ​ສະ­ເຫຼີມ­ສະ­ຫຼອງ​ວັນ​ຄູ​ແຫ່ງ​ຊາດ​ເຊັ່ນ​ດຽວ​ກັນ ໂດຍ​ມີ​ທ່ານ​ຜູ້­ຕາງ­ໜ້າ​ຈາກ​ພະ​ແນກ​ສຶກ​ສາ​ທິ​ການ ແລະ ກີ­ລາ ນະ­ຄອນ­ຫຼວງ​ວຽງ​ຈັນ ບັນ­ດາ​ແຂກ​ທີ່​ຖືກ​ເຊີນ ພະ­ນັກ­ງານ ຄູ-ອາ­ຈານ ແລະ ນ້ອງ​ນັກ­ຮຽນ​ພາຍ​ໃນ​ໂຮງ­ຮຽນ​ເຂົ້າ​ຮ່ວມ.

ໂຄງການນັກລົງທຶນ

Standard

ໂຄງການນັກລົງທຶນ ຕ່າງຊາດໃນລາວ

ໂຄງການ ລົງທຶນໃຫຍ່ໆ ຂອງນັກລົງທຶນ ຕ່າງຊາດ ໃນລາວ ສ່ວນໃຫຍ່ ແມ່ນມາໃຊ້ ຊັພຍາກອນ ທັມມະຊາດ ໃນລາວ ຫລາຍກວ່າ ບໍ່ແມ່ນມາພັທນາ ເສຖກິດລາວ ໃຫ້ຍືນຍົງ ເປັນຍ້ອນການ ຈັດຕັ້ງ ປະຕິບັດ ສັນຍາ ບໍ່ຮັດກຸມ ແລະຫນັກແຫນ້ນ ຍ້ອນມີການ ສໍ້ຣາສບັງຫລວງ ໃນລາວ.

ການພັທນາ ເສຖກິດ ໃນສປປລາວ ທີ່ອາສັຍ ຊັພຍາກອນ ທັມມະຊາດ ເປັນຫລັກ ຊື່ງເປັນການພັທນາ ທີ່ຫລາຍປະເທດ ເຮັດກັນ ເພາະບໍ່ມີທາງ ເລືອກອື່ນ ແລະ ຫລາຍຄົນກໍ່ບອກ ວ່ານະໂຍບາຍ ໃນການພັທນາ ແບບນີ້ ເປັນນະໂຍບາຍ ທີ່ດີ ແຕ່ຍ້ອນການ ສໍ້ຣາສບັງຫລວງ ແລະ ການບໍ່ຮັດແຫນ້ນ ໃນການລົງນາມ ໃຫ້ສຳປະທານ ໃນໂຄງການຕ່າງໆ ຈື່ງເຮັດໃຫ້ນັກ ລົງທືນຕ່າງຊາດ ສວຍໂອກາດໃນ ການລົງທືນໃນລາວ.

ນັກວິຊາການລາວ ທ່ານນື່ງ ຜູ້ທີ່ບໍ່ປະສົງ ອອກຊື່ເວົ້າວ່າ ໂຄງການລົງທືນໃຫຍ່ໆ ຈາກນັກລົງທືນ ຕ່າງຊາດໃນລາວ ສ່ວນໃຫຍ່ແມ່ນມາ ໃຊ້ຊັພຍາກອນ ທັມມະຊາດ ໃນລາວ ບໍ່ແມ່ນມາເພື່ອພັທນາ ໃຫ້ລາວ ຍື່ນຍົງ ກຸ່ມດັ່ງກ່າວເມື່ອ ຊັພຍາກອນ ທັມມະຊາດ ໃນລາວຫມົດໄປ ຂະເຈົ້າກໍ່ຈະ ອອກຫນີຈາກລາວ ແລະ ກໍ່ໄປຊອກຫາແຫຼ່ງ ຊັພຍາກອນ ທັມມະຊາດ ຈາກປະເທດອື່ນໆອີກ ເພື່ອການລົງທືນ ຫາກຳໄຣ. ໂຄງການໃຫຍ່ໆ ທີ່ນັກລົງທືນ ຕ່າງຊາດສວຍໃຊ້ ຊັພຍາກອນ ທັມມະຊາດ ໃນລາວ ກໍ່ແມ່ນໂຄງການ ສ້າງເຂື່ອນໄຟຟ້າ ການຂຸດຄົ້ນແຮ່ທາດ ແລະການປູກຕົ້ນໄມ້ ເສຖກິດເພດຕ່າງໆ ເປັນຕົ້ນແມ່ນ ຢາງພາລາ.

ສຳລັບໂຄງການ ສ້າງເຂື່ອນໄຟຟ້ານັ້ນ ຊັພຍາກອນ ທັມມະຊາດ ທີ່ຣັຖບານລາວ ສູນເສັຽໄປກໍ່ແມ່ນ ແມ່ນ້ຳລຳທານ ແລະລໍານ້ຳສາຂາ ປະເພດຕ່າງໆ ໃນລາວ ທີ່ຖືກຕັດແລະຕັນ ເຮັດໃຫ້ນ້ຳຖ້ວມ ໃນພື້ນທີ່ຫລາຍແຫ່ງ ຄາດວ່າ ມີລໍານ້ຳສາຂາ ເກືອບຮອດ 70 ແຫ່ງໃນທົ່ວປະເທດ ຈະຖືກຕັດແລະຕັນ ຍ້ອນການສ້າງເຂື່ອນ ຮ່ວມດ້ວຍແມ່ນ້ຳຂອງ ຊື່ງເປັນແຫລ່ງ ຫາຢູ່ຫາກີນທີ່ ອຸດົມສົມບູນຂອງ ຊາວລາວມາແຕ່ ດຶກດຳບັນ ກໍ່ຈະຖືກທຳລາຍ ໃນບາງສ່ວນ ຖ້າມີການສ້າງເຂື່ອນ.

ການສູນເສັຽ ຊັພຍາກອນນ້ຳ ທີ່ສົ່ງຜົລເຮັດ ໃຫ້ເກີດພັຍແຫ້ງແລ້ງ ຕາມພາກສ່ວນເຂດ ປູກຝັງໃນລາວ ຫລາຍແຫ່ງ ໃນຣະຍະຫລັງໆມານີ້. ນອກຈາກການເສັຽ ຊັພຍາກອນນ້ຳ ແລ້ວ ການສ້າງເຂື່ອນຍັງ ເຮັດໃຫ້ເສັຽ ປ່າໄມ້ນຳອີກ ເພາະພື້ນທີ່ສ້າງ ເຂື່ອນສ່ວນໃຫຍ່ ຈະມີປ່າໄມ້ປົກຫຸ້ມ ແຕ່ກໍ່ຖືກຕັດ ໄປຂາຍໂດຍກຸ່ມ ນາຍທືນ. ອີງຕາມການຄົ້ນຄວົ້າ ໂຄງການສ້າງເຂື່ອນ ຕ່າງໆໃນລາວ ທີ່ຣັຖບານລາວ ຈະອະນຸຍາດ ໃຫ້ນັກລົງທືນຕ່າງຊາດ ສ້າງຢ່າງນ້ອຍ 70 ເຂື່ອນ ໃນອານາຄົດ ຊັພຍາກອນ ທັມມະຊາດ ຄິດເປັນມູນຄ່າ ທາງດ້ານເສຖກິດ ທີ່ຮັຖບານລາວ ຈະສູນເສັຽໄປ ຄາດວ່າຈະຫລາຍ ພັນລ້ານໂດລາ ໃນນັ້ນ ຮ່ວມດ້ວຍມູນຄ່າ ປ່າໄມ້ ເສັຽຫາຍ ພື້ນທີ່ຖືກນ້ຳຖ້ວມ ແລະ ການສູນເສັຽ ສະພາບແວດລ້ອມ ຣະບົບນິເວດ ວີຖີຊີວີດຂອງ ປະຊາຊົນທ້ອງຖີ່ນ ແລະ ໂຄງການສ້າງເຂື່ອນ ກໍ່ເປັນໂຄງການ ພັທນາ ທີ່ບໍ່ຍືນຍົງ ເພາະຫລັງຈາກ 30-40 ປີ ໃນສັນຍາທີ່ ເຂື່ອນດ່ັງກ່າວ ຈະຕົກເປັນ ກັມມະສິດ ຂອງຣັຖບານລາວ ບໍ່ຮູ້ວ່າ ຈະມີ ສະມັດຕະພາບ ໃນການຂາຍ ໄຟຟ້າໄດ້ຫລືບໍ. ເຈົ້າຫນ້າທີ່ລາວ ທ່ານນື່ງເວົ້າວ່າ:

“ໂຄງການທີສອງ ທີ່ນັກລົງທືນ ຕ່າງຊາດ ມາສວຍໂອກາດ ໃຊ້ຊັພຍາກອນ ທັມມະຊາດ ຂອງລາວ ໃນການລົງທືນ ເພື່ອຫາກຳໄຣ ນັ້ນກໍ່ແມ່ນການ ຂຸດຄົ້ນແຮ່ທາດ. ສຳລັບໂຄງການ ຂຸດຄົ້ນແຮ່ທາດແລ້ວ ຖືວ່າເປັນການ ສູນເສັຽ ຊັພຍາກອນ ທັມມະຊາດ ທີ່ລາວມີຢູ່ ລາຍໃຫຍ່ໃຫ້ແກ່ ນັກລົງທືນຕ່າງຊາດ ເປັນຕົ້ນການຂຸດຄົ້ນ ຄຳທີ່ບໍ່ເຊໂປນ ທອງແດງທີ່ພູຄຳ ແລະ ບໍ່ຄຳທີ່ພູເບັຽ ບໍ່ສັງກະສີ ອາລູມີນຽມ ບອກໄຊ ແລະບໍ່ອື່ນໆໃນລາວ ລ້ວນແລ້ວແຕ່ການ ສູນເສັຽ ຊັພຍາກອນ ທັມມະຊາດ ຂອງລາວທັງນັ້ນ. ການຂຸດຄຳທີ່ໂຊໂປນ ແຂວງສວັນນະເຂດ ຄາດວ່າ ນັກລົງທືນ ມີລາຍໄດ້ຈາກ ການຂຸດຄົ້ນ ຫລາຍພັນລ້ານໂດລາ ໂດຍສ່ວນຮ່ວມ, ຣັຖບານລາວ ກໍ່ບໍ່ໄດ້ຫຍັງຫລາຍ ນອກຈາກຄ່າຊົດເຊີຍ ແລະອາກອນ ບາງເລັກນ້ອຍເທົ່ານັ້ນ ປະຊາຊົນທ້ອງຖີ່ນ ກໍ່ໄດ້ ຮັບຜົລກະທົບ. ນອກຈາກຈະບໍ່ມີ ລາຍໄດ້ແລ້ວ ພື້ນທີ່ ອອ້ມແອ້ມ ແລະແມ່ນ້ຳລຳທານ ໃກ້ກັບສະຖານທີ່ ຂຸດບໍ່ນັ້ນ ກໍ່ອາດຈະໃຊ້ ການບໍ່ໄດ້ ເປັນເວລາດົນນານ ຫລືອາດຈະໃຊ້ ບໍ່ໄດ້ເລີຍ.

ນີ້ເວົ້າສະເພາະ ບໍ່ຄຳທີ່ເຊໂປນ ບໍ່ດຽວ ຖ້າຮວມບໍ່ຕ່າງໆ ທີ່ຮັຖບານ ຈະອະນຸຍາດ ໃຫ້ນັກລົງທືນ ມາຂຸດຄົ້ນກວ່າ 70 ບໍ່ແລ້ວ ຄາດວ່າ ຊັພຍາກອນ ທັມມະຊາດ ຂອງລາວ ຈະສູນຫາຍໄປ ບໍ່ຮູ້ວ່າຈະຫລາຍ ປານໃດ ເຈົ້າຫນ້າທີ່ລາວ ອີກທ່ານນື່ງເວົ້າວ່າ:

“ການຂຸດຄົ້ນແຮ່ທາດ ນອກຈາກຈະເສັຽ ແຮ່ທາດທີ່ເປັນ ຊັພຍາກອນ ທັມມະຊາດ ອັນລ້ຳຄ່າຂອງລາວ ມາແຕ່ດຶກດຳບັນ ແລ້ວຍັງຈະເສັຽ ປ່າໄມ້ ແມ່ນ້ຳລຳທານ ສັດສາວາສີ່ງ ຣະບົບນິເວດ ນຳອີກ ຖ້າຄິດເປັນເງີນແລ້ວ ຄາດວ່າ ຫລາຍຕື້ໂດລາ ແລະ ໂຄງການດັ່ງກ່າວ ກໍ່ບໍ່ເປັນໂຄງການ ພັທນາທີ່ຍືນຍົງ ຖ້າແຮ່ທາດ ຫມົດໄປ ກຸ່ມນັກລົງທືນ ກໍ່ຈະອອກໄປ ຈາກລາວແລະ ຣັຖບານລາວ ກໍ່ເປັນ ຜູ້ຮັບຜິດຊອບ ໃນການສະສາງ ແລະບຳບັດພື້ນທີ່ ເອົາເອງ.

ໂຄງການລົງທືນ ລາຍໃຫຍ່ ອັນດັບສາມ ທີ່ນັກລົງທືນ ຕ່າງຊາດມາໃຊ້ ຊັພຍາກອນ ທັມມະຊາດ ໃນລາວ ໃນການຫາກຳໄຣ ທີ່ສຳຄັນອີກ ອັນນື່ງ ກໍ່ແມ່ນການປູກ ຕົ້ນໄມ້ເສຖກິດ ດັ່ງການປູກ ຢາງພາລາ. ໂຄງການການ ປູກຢາງພາລາ ເປັນໂຄງການທີ່ ໃຊ້ຊັພຍາກອນ ທັມມະຊາດ ລາຍໃຫຍ່ໃນລາວ ເຊັ່ນຕົວຢ່າງ ການປູກ ຢາງພາລາ ຈະໃຊ້ພື້ນທີ່ ຫລາຍສີບພັນເຮັກຕາ ໃນທົ່ວປະເທດ ໂຄງການດັ່ງກ່າວ ນອກຈາກຈະເສັຽ ພື້ນທີ່ແລ້ວ ກໍ່ຍັງເສັຽປ່າໄມ້ ແລະແມ່ນ້ຳລຳທານ ນຳອີກ ເພາະ ກຸ່ມນາຍທືນ ຕ້ອງໄດ້ຕັດໄມ້ ອອກໄປຂາຍ ຈາກພື້ນທີ່ກ່ອນ ຈະປູກຢາງພາລາ ໄດ້ ການຕັດຕົ້ນໄມ້ ໃນຫລາຍພັນເຮັກຕາ ກໍ່ເປັນ ກັມມະສິດລາຍໄດ້ ຂອງນັກລົງທືນ ຣັຖບານລາວ ກໍບໍ່ມີສ່ວນໄດ້ ຈາກການຂາຍໄມ້ນີ້. ເຈົ້າຫນ້າທີ່ລາວ ອີກທ່ານນື່ງເວົ້າວ່າ:

“ການປູກ ຢາງພາລາ ນອກຈາກຈະເສັຽ ພື້ນທີ່ ຫລາຍພັນເຮັກຕາ ໃນທົ່ວປະເທດແລ້ວ ກໍ່ຍັງຈະເຮັດ ໃຫ້ດີນ ແລະແມ່ນ້ຳລຳທານ ເສັຽຫາຍນຳອີກ ເພາະສານເຄມີ ທີ່ກຸ່ມນັກລົງທືນ ໃຊ້ໃນການປູກຝັງ. ມູນຄ່າຂອງ ຊັພຍາກອນ ທັມມະຊາດ ທີ່ລາວເສັຽໄປ ຈາກການປູກ ຢ່າງພາລາ ຖ້າຈະຄິດເປັນເງີນ ກໍ່ອາດຈະຕົກ ຢູ່ຢ່າງ ມະຫາສານ ແລະກໍ່ເປັນ ໂຄງການພທັນາ ບໍ່ຍືນຍົງ ເພາະວ່າຖ້າຣາຄາ ຢາງພາລາຕົກ ກຸ່ມດ່ັງກ່າວ ກໍ່ອາດຈະບໍ່ປູກ ຫລືອອກຫນີໄປ ແລະພື້ນທີ່ປູກ ຢາງພາລາ ກໍ່ອາດ ໃຊ້ການບໍ່ໄດ້ ເພື່ອປູກພືດຊນີດອື່ນ ເພາະສານເຄມີ ທີ່ໃຊ້ໃນການປູກ.

ເຖີງຢ່າງໃດ ກໍ່ຕາມ ນັກວີຊາການ ທ່ານດຽວກັນນັ້ນ ກ່າວເພີ້ມອີກວ່າ ສີ່ງທີ່ຣັຖບານລາວ ຄວນຈະເຮັດ ໃນການໃຫ້ສຳປະທານ ແກ່ນັກລົງທືນ ຕ່າງຊາດ ໃນໂຄງການ ເຫລົ່ານັ້ນ ກໍ່ແມ່ນວ່າ:

1- ຣັຖບານຄວນ ກຳນົດສ່ວນແບ່ງ ໃນການລົງທືນ ຈາກກຸ່ມ ບໍຣິສັດດັ່ງກ່າວ ໃນອັຕຣາອັນ ເຫມາະສົມ ເພື່ອມາພັທນາ ເສຖກິດຂອງຊາດ ບໍ່ແມ່ນເກັບເອົາ ແຕ່ອາກອນພາສີ ຈາກການ ສຳປະທານ ເທົ່ານັ້ນ.

2- ຣັຖບານລາວ ຄວນໃຫ້ ບໍຣິສັດຜູ້ ລົງທືນຝືກອົບຣົມ ພນັກງານລາວ ກ່ຽວກັບວຽກງານ ໃນໂຄງການ ເຫລົ່ານັ້ນ ໃນຣະຍະຍາວ ເພື່ອຈະເປັນ ຊັພຍາກອນມະນຸດ ໃນລາວ ໃນອານາຄົດ ດັ່ງການສ້າງເຂື່ອນ ການຂຸດຄົ້ນແຮ່ທາດ ແລະ ການປູຸກຕົ້ນໄມ້ ເສຖກິດ.

3- ກຳນົດກົດເກນ ການປັບປຸງພື້ນທີ່ ແລະຣະບົບນິເວດ ໃຫ້ຊັດເຈນ ໃນເຂດພື້ນທີ່ ທີ່ມີການລົງທືນ ຫລັງຈາກ ທີ່ກຸ່ມນາຍທືນ ອອກຫນີໄປ.

4- ພື້ນທີ່ ໃນການລົງທືນ ຕ້ອງໃຫ້ເປັນ ເຫມືອນເດີມ ຫລັງຈາກສີ້ນສຸດ ການລົງທືນ ດັ່ງການຂຸດຄົ້ນ ແຮ່ທາດ ພື້ນທີ່ດັ່ງກ່າວ ຫລັງຈາກໝົດ ແຮ່ທາດແລ້ວກໍ່ຈະ ສາມາດ ເອົາມາໃຊ້ປະໂຫຍດ ແນວອື່ນໄດ້.

5- ສົ່ງເສີມການລົງທືນ ທີ່ຍືນຍົງໃນ ຂແນງອື່ນໆ ດັ່ງການທ່ອງທ່ຽວ ແລະອຸດສາຫະກັມ ຜລີດເພື່ອສົ່ງອອກ ໃຫ້ແກ່ ປະຊາຊົນລາວ ໃນຣະຍະຍາວ ເປັນແຜນການ ການລົງທືນທີ່ດີ ໃນລາວ.

ເປັນທີ່ຮູ້ກັນວ່າ ໂຄງການ ການລົງທືນໃນລາວ ຈາກນັກລົງທືນ ຕ່າງຊາດ ສ່ວນໃຫຍ່ ແມ່ນບໍຣິສັດ ຂນາດນ້ອຍ ແລະຂນາດກາງ ເປັນກຸ່ມທີ່ມີ ທືນນ້ອຍ ແລະກໍບໍ່ມາ ເພື່ອຈະພັທນາ ໃຫ້ລາວມີເສຖກິດ ກ້າວຫນ້າ ມາເພື່ອຜົລປະໂຫຍດ ຕົນເອງຫລາຍກວ່າ. ປະເທດທີ່ມີ ການລົງທືນລາຍ ໃຫຍ່ໃນລາວ ໃນເວລານີ້ ກໍ່ແມ່ນຈີນ ໄທແລະວຽດນາມ ສຳລັບຈີນແລ້ວ ກໍ່ແມ່ນກຸ່ມ ນັກລົງທືນລາຍນ້ອຍ ໄທແລະວຽດນາມ ກໍ່ເຫມືອນກັນ.

ນັກວິເຄາະທາງ ດ້ານເສຖກິດ ໃນລາວທ່ານນື່ງ ພັດເວົ້າວ່າ ໂຄງການພັທນາ ໃນລາວ ເປັນໂຄງການທີ່ ສ້າງລາຍໄດ້ໃຫ້ ແກ່ຣັຖບານລາວ ບໍ່ດ່ັງນັ້ນ ສປປລາວ ຈະມີລາຍໄດ້ ມາຈາກໃສ ອາສັຍແຕ່ການ ຊ່ອຍເຫລືອຂອງ ຕ່າງປະເທດ ກໍ່ບໍ່ຈົບສີ້ນຈັກເທື່ອ ຊ້ຳຍັງເປັນຫນີ້ ຕ່າງປະເທດຫລາຍຂື້ນ ໃນແຕ່ລະປີ.

ຖ້າຣັຖບານ ສາມາດປາບປາມ ການສໍ້ຣາສບັງຫລວງ ຊື້ຈ້າງຈອບອອຍ ຈາກເຈົ້າຫນ້າທີ່ ຣັຖແລ້ວ ໂຄງການພັທນາ ຕ່າງໆໃນລາວ ກໍ່ຈະສ້າງ ຜົລປະໂຫຍດຕໍ່ ປະເທດຊາດ ແລະ ປະຊາຊົນລາວ ໄດ້ຫລາຍຂື້ນ.