ບໍ­ລິ­ສັດ ສະ­ຫະ​ກໍ່­ສ້າງ​ຄົບ​ວົງ​ຈອນ ຈຳ­ກັດ​ຜູ້​ດຽວ ໄດ້​ຖືກ​ມອບ​ໝາຍ​ຈາກ​ລັດ­ຖະ­ບານ ໃນ​ການ​ກໍ່­ສ້າງ​ເສັ້ນ­ທາງ​ແຕ່​ກິ­ໂລ­ແມັດ​ທີ 22 ເສັ້ນ­ທາງ 13 ໃຕ້-ຫົວ​ຊຽງ-ຖະ­ໜົນ 450 ປີ ດ້ວຍ​ມູນ​ຄ່າ​ກໍ່­ສ້າງ​ທັງ​ໝົດ 524 ຕື້​ກວ່າ​ກີບ ໂດຍ​ແມ່ນ​ບໍ­ລິ­ສັດ​ເປັນ​ຜູ້​ລົງ­ທຶນ​ກ່ອນ ແລະ ລັດ­ຖະ­ບານ​ຈະ​ຊຳ­ລະ​ຄືນ​ໃນ​ກຳ­ນົດ​ເວ­ລາ 7 ປີ ເລີ່ມ​ແຕ່​ສົກ​ປີ 2012-2013ເປັນ­ຕົ້ນ​ໄປ.

ໂຄງ­ການ​ດັ່ງ­ກ່າວ ແມ່ນ​ເປັນ​ອີກ​ໂຄງ­ການ​ໜຶ່ງ​ໃນ​ການ​ພັດ­ທະ­ນາ​ເສັ້ນ­ທາງ​ວົງ​ແຫວນ​ຮອບ​ນອກ ເພື່ອ​ເຊື່ອມ​ຕໍ່​ລະ­ຫວ່າງ​ເສັ້ນ­ທາງ​ເລກ​ທີ 13 ໃຕ້ ແລະ ເສັ້ນ­ທາງ​ເລກ​ທີ 11 ຢູ່​ເຂດ​ເມືອງ​ຫາດ​ຊາຍ​ຟອງ ເປັນ​ເສັ້ນ­ທາງ​ທີ່​ຜ່ານ​ເຂດ​ອຸດ­ສາ­ຫະ­ກຳ​ໂນນ​ທອງ ແລະ ເຂດ​ອຸດ­ສາ­ຫະ­ກຳ​ໄຊ​ເຊດ​ຖາ (ຫຼັກ 21) ແລະ ຈະ​ເປັນ​ເສັ້ນ­ທາງ​ຮັບ​ໃຊ້​ໃນ​ການ​ຂົນ­ສົ່ງ​ຫີນ​ຊາຍ​ຈາກ​ເມືອງ​ຫາດ​ຊາຍ​ຟອງ ເຂົ້າ​ຮັບ​ໃຊ້​ໂຄງ­ການ​ກໍ່­ສ້າງ​ຕ່າງໆ.

ເສັ້ນ­ທາງ​ດັ່ງ­ກ່າວ ແມ່ນ​ມີ​ຄວາມ​ຍາວ 19,07 ກິ­ໂລ­ແມັດ ຈະ​ສ້າງ​ເປັນ​ທາງ​ເບ​ຕົງ​ເສີມ​ເຫຼັກ ກວ້າງ 18 ແມັດ ມີ 4 ຄອງ​ລົດ​ແລ່ນ ມີ​ດອນ​ກາງ​ທາງ 1 ແມັດ ສະ­ເພາະ​ຢູ່​ເຂດ​ຊຸມ​ຊົນ​ຈະ​ກໍ່­ສ້າງ ທາງ​ຍ່າງ ຮ່ອງ​ລະ­ບາຍ​ນ້ຳ ໄຟ​ເຍືອງ​ທາງ.

ໂຄງ­ການ​ກໍ່­ສ້າງ​ເສັ້ນ­ທາງ​ແຫ່ງ​ນີ້ ແມ່ນ​ເປັນ​ການ​ປະ­ຕິ­ບັດ​ຕາມ​ໂຄງ​ສ້າງ​ຕົວ​ເມືອງ​ຂອງ​ນະ­ຄອນ­ຫຼວງ​ວຽງ​ຈັນ ທີ່​ໄດ້​ກຳ­ນົດ​ໄວ້​ໃຫ້​ເປັນ 3 ເຂດ ຄື: ເຂດ​ຕົວ​ເມືອງ​ທີ່​ເອີ້ນ​ວ່າ ຍ່ານ​ທຸ­ລະ​ກິດ ແລະ ເຂດ​ທີ່­ຢູ່​ອາ­ໄສ​ອ້ອມ​ຮອບ​ເຂດ​ໃຈ­ກາງ​ຍ່ອຍ ປະ­ກອບ​ດ້ວຍ​ເຂດ​ຫຼັກ 21 ເຂດ​ທ່າ​ນາ​ແລ້ງ ເຂດ​ດົງ​ໂດກ ເຂດ​ນາ​ຊາຍ​ທອງ ເຂດ​ເມືອງ​ໃໝ່​ໜອງ​ປິງ ບຶງ​ທາດ­ຫຼວງ ແລະ ລຽບ​ຕາມ​ຖະ­ໜົນ 450 ປີ ແລະ ຍັງ​ມີ​ເຂດ​ຕົວ​ເມືອງ​ອ້ອມ​ຮອບ ຫຼື ເອີ້ນ​ວ່າ​ເມືອງ​ໝູ່​ດາວ ແມ່ນ​ເນັ້ນ​ໃສ່​ເຂດ​ທ່າ​ງ່ອນ ເມືອງ​ໄຊ​ທາ­ນີ ເຂດ​ບ້ານ​ພ້າວ ເມືອງ​ປາກ​ງື່ມ ແລະ ເຂດ​ບ້ານ​ໂຄກ​ແຮ້ ເມືອງ​ສັງ​ທອງ.

ພິ­ທີ​ເຊັນ​ສັນ­ຍາ​ໂຄງ­ການ​ກໍ່­ສ້າງ​ເສັ້ນ­ທາງ​ດັ່ງ­ກ່າວ ໄດ້​ຈັດ​ຂຶ້ນ​ໃນ​ວັນ​ທີ 5 ຕຸ­ລາ 2012 ຜ່ານ​ມາ ທີ່​ໂຮງ­ແຮມ​ລາວ​ພລາ​ຊາ ລະ­ຫວ່າງ​ທ່ານ ເດດ​ສົງ­ຄາມ ທຳ​ມະ​ວົງ ຫົວ­ໜ້າ​ພະ​ແນກ​ໂຍ­ທາ​ທິ​ການ-ຂົນ­ສົ່ງ​ນະ­ຄອນ­ຫຼວງ​ວຽງ​ຈັນ (ຝ່າຍ​ເຈົ້າ​ຂອງ​ໂຄງ­ການ) ແລະ ທ່ານ ຄຳ​ເຮືອງ ພົງ​ສະ­ຫວັນ ປະ­ທານ​ບໍ­ລິ­ສັດ ສະ­ຫະ​ກໍ່­ສ້າງ​ຄົບ​ວົງ​ຈອນ ຈຳ­ກັດ​ຜູ້​ດຽວ (ຝ່າຍ​ຜູ້​ຮັບ​ເໝົາ) ຊຶ່ງ​ມີ​ທ່ານ ແກ້ວ​ພິ­ລາ​ວັນ ອາ​ໄພ​ລາດ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ພ້ອມ​ບັນ­ດາ​ພະ­ແນກ­ການ​ກ່ຽວ­ຂ້ອງ​ເຂົ້າ​ຮ່ວມ​ເປັນ​ສັກ­ຂີ​ພິ­ຍານ.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s